熱門:

2022年1月21日 即巿股評 港股直擊

【輪證贏家】滙豐Put 已到達首個目標

噚日揀咗隻恒指牛(53937),仲喺上半場迫巴士咁迫咗落場,set定走貨位為五分鐘圖失50分鐘線(五分鐘圖10線)。最終,喺噚日下晝1點50分,指數失守50分鐘線,以當時計又用返10分鐘量度平均走貨價,(53937)高低位做過0.062元/0.061元計,平均走貨價為0.0615元,對比噚日朝早嘅平均買入價0.0495元,平均賺幅為24.24%。

至於隻滙控(00005)Put(22014),以目標為日線圖嘅10天線作為第一個Check Point的話,恭喜晒!今日已經順利抵壘,基本上有貨嘅呢啲位隨時可以先食一趟,如果你注碼大嘅話,亦都可以考慮食半留半;貪心鬼想博埋日線Slow STC(14,3)落返去超賣水平嘅話又得啫,反正今日見股價低於10天線以下水平,如果打算做貪心鬼的話,咁反過來以股價上破返10天線為止蝕位。呢一注,我決定再坐耐少少,做個貪心鬼(鬼咩...我偉大嘅母親今年牛一撞正大年初一,佢封生日+新年大利是...滙控你要幫幫手呀!)

噚晚喺三位經驗富豐嘅講者領導下,我呢個初嚐主持滋味嘅𡃁妹終於都成功做完一場webina,更要多謝嘅係每一位報名嘅朋友,令到更加多人知道點解以前我死都唔肯做錄音/節目(終於都有人發現我入咪把聲係極度古怪);「咁點解依家又肯做呀?」Well,你當係為咗我家肥貓啲罐罐啦。

依家10點13分,恒指低開後一度跌逾130點,不過喺五分鐘圖上見到指數已經踩返住條250分鐘線(五分鐘圖50線)呈上,跌幅收窄,依家跌幅已經收窄到得返跌30點,報24914點,其實,以呢口價計,指數仍然靠近上方熊證街貨,又見到熊證喺第二同第三層,即25000至25099點,同埋25100至25199點都儲返唔少街貨喺度,即使今日見到下方牛證有新層街貨層,上到24200至24299點,但同恒指現價都仲有700幾點嘅差距,似乎指數上行係唯一殺街貨嘅方向咁。

再過多7分鐘,恒指喺五分鐘圖上見到開始痴住條保歷加通道中軸橫行,的確,如今日作戰室裡頭嘅戰友所講,指數今日真係難玩,反正有隻(22014)喺手,就繼續玩埋隻(22014)兼花少少時間搵下有無個股可以玩下先。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。

 

 

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads