熱門:

2021年6月23日 即巿股評 港股直擊

【盤房來料】新能源汽車吼回調搵位上車

聯儲局喺上周議息會議口吻開始轉鷹,阿Man都話咗係出口術遏止通脹急升,轉個頭隔晚鮑爺喺聽證會言論傾向溫和,帶動美股隔晚做好,納指再創收市新高,港股喺連續兩日回調後,今日終於識得彈,成功收復50日線。恒指高開176點,開市後升幅曾收窄至96點,見28406點半日低位,其後再發力先上10日線(28624),最多升452點,見28762點,目前剛剛企喺50日線(28721)。恒指中午收報28721點,升412點;國企指數報10619點,升149點;恒科指升146點,報7958點。

藍籌之中,頽咗幾日嘅科網巨頭終於識彈,騰訊(00700)跟阿里(09988)分別升1.1%及1.9%;小米(01810)就削啲,半日升唔夠0.2%,暫時喺27水平爭持;美團(03690)至醒彈4.2%,升穿埋300短期阻力,睇吓仲有冇力向上挑戰310-315水平。市場預期蘋果喺9月會推出4款新iPhone,一對蘋概孖寶舜宇(02382)跟瑞聲(02018)分別升6.6%及3.5%,暫時兩股走勢仍向好,有貨可以keep。相反海底撈(06862)就真係愈撈愈底,未能止跌繼續向下尋底,半日再跌3.5%,唔知第幾次藍籌之中包尾。安踏體育(02020)再創新高,其他體品股亦做好。

生物科技股今日表現出色,阿Man呢期愛股信達生物(01801) PD-1聯合化療食管鱗癌研究屆主要終點,半日升6.7%,呢隻都算係阿Man組合之中,出出入入得嚟長期有收穫嘅優質股,由B仔玩到甩B,睇住公司成長,自己個荷包都跟位股價漲,呢種感覺特別興奮。至於藥明生物(02269)更加唔使講,長玩長有,阿Man係長期擁躉,此股神奇之處係每次批完股都繼續上,過去兩年接批股貨嘅捧場客無一損手,個個都係贏家。至於另外兩個CRO代表康龍化成(03759)跟方達控股(01521)再創新高,不過阿Man一向鍾情龍頭,反而忽視咗呢對孖寶嘅威力。其實咁多股份又邊度買得晒,買中一隻長炒長有長升嘅龍頭藥明,已經證明眼光唔錯。

新能源汽車股呢期表現脫胎換骨,相對一個月前死氣沉沉,呢個板塊近日值得關注,只係今日急升就唔追貨住,所列入觀察名單,見回調又企穩支持,可以搵位上車。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads