港股直擊 | 2023-12-28 14:27

【盤房來料】港股年結重上萬七關 一月開局可續彈

美股仍然憧憬明年聯儲局減息，繼續聖誕老人行情，隔晚反覆造好，道指升111點再破頂，標指則向歷史高位步步進逼，收市升6點；納指則升24點。不過假期氣氛仍然濃厚，交投淡靜，而基金樂見美股在高位年結。至於反映中概股表現嘅金龍指數及港股ADR則變化不大，A股噚日回穩，而上周五急跌嘅騰訊(00700)及網易(09999)反彈，帶動恒指噚日回升284點，成功重越5天(16541)，10天(16513)及20天線(16583)，今日港股表現唔會太差。

不過，港股要扭轉本月跌勢，今明兩日需要升超過450點，重上17050之上，港股本月才有望終結之前四個月連跌之勢。恒指高開53點，升幅曾收窄至19點，見16644半日低位，但A股表現強勁，美滙指數回落，人民幣亦向好，港股升幅隨之擴大，最多升289點，高見16914，午市略回順。恒指半日升251點，報16876；國指收5706，升102點；科指升75點，收3715。半日成交額509.77億元，喺假日氣氛仍濃厚之際，都算唔錯。

重磅科技股反彈持續，騰訊(00700)半日升1.3%，美團(03690)升4%，AMTJ之中表現最好，阿里(09988)升1%，京東(09618)升2.7%，百度(09888)半日亦升2.1%。不過，小米(01810)喺今日下午新車發布會前逆市跌0.7%。金融股繼續造好，大笨象(00005)升0.5%，友邦(01299)同樣升0.5%，港交所(00388)則升2.5%。內銀股普遍升1%左右；平保(02318)半日升3.6%，跑贏國指同恒指。

汽車股今日有追捧，吉利(00175)旗下電動車品牌極氪(Zeekr)，有新車款極氪007噚日正式上市，半日急升6.2%。其他非全電動車股均拉升，廣汽(02238)升2.6%，東風(00489)彈高1.9%，長城汽車(02333)升2.9%。至於電動車股亦造好，比亞迪(01211)半日升3.1%，理想(02015)走高4.6%，小鵬(09868)升0.1%。作為4S股代表嘅中升(00881)半日升6.8%，為升幅最大藍籌。

紅海危機漸減退，航運股今早續逆市走軟。東方海外(00316)半日跌1%，藍籌之中跑第尾；其母公司中遠海控(01919)回落0.9%，海豐(01308)跌1.3%；乾散貨代表太平洋航運(02343)跌0.8%；主打能源運輸嘅中遠海能(01138)更跌近3%。

港股若能喺今明兩日扭轉過去四個月跌勢，重返萬七大關，2024年開局好大機會可以展開一個較為似樣啲嘅反彈，不過暫時50天線及100天線阻力仍大，過去多個月都係反彈至呢啲水平回頭，除非有更多利好政策及有新資金流入，否則反彈至100天線，未能進一步向上突破18000水平，港股仍難走出上落市偏弱格局。

麥狄文

(徐狄怡‧證監會持牌人)