港股直擊 | 2023-12-14 10:40

【環宇搜股】減息揭幕 黃金落鑊

美股由11月起狂挾，挾到道指創埋收市新高，標指更由10月低位狂彈14.7%，納指100更反彈17.8%，愈來愈接近重臨牛市邊緣。

尤其是隔晚聯儲局主席中門大開，在議息會議上開金口，表明有討論減息時間點，就喺呢點已令市場相當亢奮，除了美滙指數下跌外，全球風險資產齊齊飆上。

市場反應認為聯儲局大放白鴿，但事實當然唔喺，從聯儲局最新息口預測，2024年息口中位數由9月預期的5.1%，大幅向下調至4.6%，更的意是2025年息口中位數也下修0.3個百分點至3.6厘，即比2024年仲要減多一厘。

心水清的話，目前美國息口5.25至5.5厘，要2025年跌至中位數只得3.6厘，意味局方計劃減息近兩厘，幅度絶對唔細。其實是鮑公只喺笑裏藏刀，根本是大力加息令經濟失速，最終要聯儲局大力劈息。

更重要一點是，聯儲局的點陣圖過往都喺錯錯錯。最初是加得太遲，本輪預測也大有機會減得太慢，目前市場估每次減息都只是四分一厘，但按鮑威爾執掌的聯儲局，誤判市況當食生菜，所以筆者認為明年劈息幅度會遠比市場預期多，甚至是會出現劈半厘的情況。

棄股買金 債返牛市

講到最尾都喺講如何部署。第一就是要做定期就一定要快，原因是減息即將開始，存款利率將會大幅下調，其次是減息周期開始之時，股市必定無運行，要遠離股市。

第三就是債市牛市將會重臨，但近期TLT升得幾急，建議揾個靚位可以買入。最後就是黃金，明年第一季前，估計金價表現會相當唔錯，尤其利率下行下，參照08金融海嘯及疫情時表現(圖)，實際利率大有機會跌向零水平，之後甚至轉向負發展，對於金價來講即喺由逆風便做順風，明年金價仍睇2500美元關。

編按:作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周四在「信報網站」及「港股360」撰文。