港股直擊 | 2023-11-28 14:47

【盤房來料】結算前夕淡靜 反彈阻力重重

雖然感恩節Black Friday嘅銷售數據差過預期，但美股又唔算好大反應，牛皮偏軟，仍然高位整固。標指從4300水平一口氣回升至4550水平，於4600前阻力較大，短期整固一下亦好正常。道指隔晚跌56點，標指跌8點，納指則跌9點，相對整個11月由低位反彈嘅升幅，呢啲回吐幅度濕濕碎，美股仍然係牛氣沖天，強勢依然。反觀港股就繼續沽壓未止，兩個交易日跌385點後，半日再跌逾百點。

恒指高開16點報17541，又成為半日高位，甫開市即掉頭向下，半日最多跌122點，見17402低位。中午恒指收報17419，跌105點；國指跌43點，報5981；恒科指跌12點，收4019，暫時叫守住個四千大關。半日成交額只有435億元，缺水問題持續。

重磅科網股個別發展，美團(03690)將公布季績，但股價半日跌3.3%，為表現最差藍籌股，未知績後股價會否進一步向下，連紅底股身份亦不保。騰訊(00700)、京東(09618)及攜程(09961）跌逾1%，阿里(09988)更跌近2%，單係呢堆科網股已佔去恒指近八成跌幅。只有小米(01810)逆市升3.4%，守穩15元回勇，保持強勢。

金融股亦全線向上，招行(03968)半日跌近3%表現最差，平保(02318)跌1.8%，其他內銀股跌少於0.5%。不過自從阿爺開到口要內銀救內房，仲要係無抵押貸款，等於將個計時炸彈由內房搬咗去內銀，反而影響埋市場對內銀股信心。至於說好的內房白名單又無咗件事，阿爺話對所有內房一視同仁，令市場更難捉摸邊啲內房仲有得救，索性全部跳車唔持貨好過，內房股普遍下跌。

之前阿Man都講過，只有醫藥股係較為有資金肯留低嘅一個板塊，翰森製藥(03692)半日升5.1%，藍籌之中表現最好。石藥(01093)升近3%，中生製藥(01177)升0.8%，國藥(01099)0.7%，藥明生物(02269)則靠穩，半日無起跌。

另一個今日表現較好嘅板塊係蘋概股，有報道指蘋果公司在12月正式量產第一代MR(混合現實)產品Vision Pro，當中內地供應鏈比例大幅提高至六成，蘋概股逆市升。瑞聲(02018）半日升7.8%，高偉(01415)升6.5%，舜宇(02382)揚4.3%，比亞迪電子(00285)升0.7%，鴻騰(06088)漲0.9%，通達(00698)乾升3.9%。

港股喺期指結算前交投持續淡靜，但內地經濟增長未見起色，港股又太多中資企業，內地無起色，港股亦死到直，再加上成交持續薄弱，缺乏流動性下，港股反彈困難重重，暫時能守住17350本月上升軌已算好彩，一個唔覺意失守埋，只有再向下試16800至17000尋找支持，即使再重返底部見支持，反彈困難重重，17500、17700及18000，個個位都有阻力。

麥狄文

(徐狄怡‧證監會持牌人)