港股直擊 | 2023-11-23 14:03

【盤房來料】基金粉飾櫥窗 港股年結前可審慎樂觀

美國今日感恩節假期休市，隔晚美股保持升勢，三大指數上升，道指升184點，標指及納指分別升48點及65點，最近七個交易日升咗六日，本周只餘下明日半日市，周末睇埋black Friday銷售，估計仍有單位數增長。美股就係強，市場流動性充裕，一回調就有低吸買盤。相反港股喺缺乏流動性，場內資金面薄弱下，動彈不得，挑戰萬八關未能穩，再度回軟。港股今早反覆偏軟，一度失守10天線(17630)及50天線(17595)。

恒指低開54點，跌幅一度收窄至11點，見17723半日高位；其後喺A股仍反彈下，港股自殘再度擴大跌幅至157點，見17577半日低位，考驗10天及50天線後爭持。半日恒指收報17669，跌64點；國指微升1點，報6075；恒科指則升20點，收4050。半日成交維持淡靜，只有409億元，人哋美國就話放感恩節假期，香港呢邊無事無幹都咁靜，可見港股一潭死水，水清無魚，無資金肯入場。

重磅科技股個別發展，小米(01810)未能止跌，半日再跌0.6%，阿里(09988)亦跌0.6%；美團(03690)跟網易(09999)分別跌0.8%及1.1%，不過騰訊(00700)跟京東(09618)分別升0.5%及0.9%，攜程(09961)則反彈3.7%。

金融股偏軟拖死大市，大笨象(00005)跟平保(02318)半日齊跌0.9%，港交所(00388)半日跌0.8%，友邦(01299)半跌0.7%，四大內銀股跌0.5%至0.7%。內銀股跟內險股走弱，當然同A股表現不濟，以及內房債務危機爆雷有關，雖然阿爺已多次出招救內房，可惜內銀就要孭起呢個包袱，搞到啲內銀股完全升唔起，令大市少咗一股向上動力。

據悉中國金融監管部門正在起草的50家房企白名單接近完成，內房股繼續炒作「白名單」消息，最先透露獲列入名單嘅龍湖(00960)半日升近一成，成為最好表現藍籌股。高危債務內房股，而又有機會被納入白名單嘅內房股，今日閒閒地升一成以上，而債務王恒大(03333)唔知有冇機會入白名單，股價半日僅升7.5%，算係升得少。而有指大機會入選嘅旭輝(00884)最誇張，半日勁升逾五成。而物管股亦跟內房股炒上，旭輝永升(01995)半日升逾兩成，其他物管股普遍升半成以上。

金價上過2000美元未能企穩，只係到此一遊，金礦股全線向下，招金(01818)挫3%，山東黃金(01787)挫3.4%，中國黃金(02099)跌2.9%，紫金(02899)跌2.6%。SPDR金ETF(02840)則跌0.4%。

以客觀條件嚟講係利好後市，10年美債息已見回落至4.4%水平，市場預期息口已見頂，加上人民幣大幅反彈，扭轉持續向下的弱勢，貶值預期告一段落，加上習拜會後中美關係有所緩和，至少唔會繼續惡化。目前可以話萬事俱備，只欠生水，無資金流入，改善場內資金面薄弱問題，莫講話寸進，港股只能行一步，褪後兩步。加上目前投資者對中港股市信心不足，即使有資金入場炒作，都只係短暫停留，港股略為反彈即見獲利回吐，令港股未能一氣呵成向上突破。

恒指日線圖正營造三角形走勢，候消息配合突破爆邊，阿Man對年結前呢一兩個月嘅睇法較為樂觀，做返少少粉飾櫥窗，重上18500至19000水平，基金年底盤數唔使太難睇，呢個要求唔算過份。

麥狄文
(徐狄怡‧證監會持牌人)