港股直擊 | 2023-09-07 13:42
美國ISM非製造業PMI升至54.5,創6個月新高,加上油價持續攀升,美國通脹壓力回升,再有美聯儲委員放話支持加息,債息進一步向上,美股借勢回吐,道指跌198點,標指跌31點,納指跌148點。美匯指數強勁,人民幣低見7.32水平,加上市場憂慮中美關係持續緊張,甚至再轉差,港股偏軟,今早曾跌逾200點。恒指低開12點,開市價18437已經係半日高位,甫開市已持續向下,內地公布上月出口數據,雖然跌幅低過預期,但亦拖累港股跌204點,見18245半日低位。中午恒指報收18274,跌175點;國指跌58點,報收6344;恒科指報收4114,跌61點。半日成交額只有435.9億元,又係嗰句,跌市雖然成交少,但亦反映咗無資金吼跌市時買嘢,市場無乜入市意欲。
雖然今早內房股仍然高開,但唔係阿Man要睇死呢個板塊,債務問題一日未解決,都係有波幅,冇升幅,今日回吐,跌幅由超過3%至超過一成不等,噚日手多去高追,今日又要坐艇。重點係提防炒高隨時嚟配股抽水,噚日都講咗內房有機會發新股還畀債主。
重磅科網股偏軟,攜程(09961)業績又唔係太差,但股價績後持續走軟,半日再跌3.3%。京東(09618)跟美團(03690)半日跌逾2%,騰訊(00700)跟百度(09888)半日分別跌1.9%及1.5%,阿里(09988)半日跌0.8%,暫時叫穩守90元之上,網易(09999)半日則跌0.1%。
金融股大部分腳軟,港交所(00388)半日跌1.4%,股價再失310元,到呢一刻港府未有表態係咪減印花稅,港股成交持續低迷,港交所暫難有起色。平保(02318)半日跌2.2%,內銀跟內險股中,表現較差,其他內銀及內險股,普遍跌少於1%,工行(01398)更無厘頭逆市升0.8%。友邦(01299)半日跌1.1%,呢期走勢都算弱,唔上返70水平企穩,友邦都係弱勢難扭轉。油價持續向上,中石油(00857)跟中海油(00883)半日逆市升2.4%及1.9%,後者今日除淨,股東財息兼收。至於中芯(00981)向華為提供晶片,涉違反美國對華為制裁令,市場憂慮加大制裁,中芯半日跌半成,係表現最差藍籌股。
阿爺雖然使出組合拳,但內地經濟復甦動力不足,加上美元近日持續轉強,令人民幣兌美元滙價昨日跌穿7.32關,係去年11月以來最低,一日人民幣無法回穩,港股受拖累下易跌難升,今日再失10日線及20日線,後市都係瓜多過菜。加上港股流動性不足問題嚴重,成交持續低迷,升市無人追貨,跌得勁亦無人願沽,買賣兩閒,變成一潭死水。港府嘅研究小組唔知仲要花幾多時間去研究,遲遲未能推出措施去激活港股,港股都係清水無魚,愈玩愈謝。
麥狄文
(徐狄怡‧證監會持牌人)