即巿股評 | 2023-08-10 13:23

【盤房來料】美國制裁停不了 港股再失全部平均線

喺美國公布CPI前夕，美股隔晚走軟，科網股氣氛較差，主要係軟銀有份投資嘅WeWork表示「嚴重懷疑」能否繼續經營，股價大跌38%，孫正義呢項投資又撞山，軟銀喺過去幾年大量投資呢類燒錢公司，結果，軟銀呢兩年要大量沽貨套現先捱得住。納指隔晚跌162點，道指跟標指分別跌191點及31點，標指留意4400至4450支持守唔守得住。暫時VIX仍然喺危險水平之下，但要留意一旦升穿17，美股走勢可能逆轉。

至於港股噚日低位回升收市，中概股隔晚借勢反彈，但大部份股份高開低走，甚至倒跌收市。美股收市後，拜登簽署法令限制美資在華投資敏感技術，包括香港及澳門。呢個制裁消息難免令港股低開，不過中國一向要面子，你制裁我，我就反制裁你個制裁，無實際出招都要打嘴炮回應，唔排除今日港股又上演中外大戰，外資沽，中資力托，港股未必會因為制裁呢個消息而大跌，跌少過二百點都算係頂得吓。

恒指低開121點，一開市已失50天線(約19208)，雖然跌幅曾收窄至47點，見過半日高位19198，但始終畀條50天線壓住，再度擴大跌幅至最多215點，見19030半日低位，叫做險守萬九心理關口。半日恒指跌183點，收報19062；國指跌63點，報6550；恒科指收4308，跌65點。半日成交額只有430.73億元，由高位20300點跌咗逾千點落嚟，仍未見有資金肯入場趁低吸納，令成交持續低迷。

藍籌股普遍偏軟，大笨象(00005)今日除淨，股價則跌0.8%，呢幾日先入場博財息兼收嘅缸邊友，未能如願以償。港交所(00388)半日跌0.5%，但仍守住條20天線，相對大市算硬淨；至於友邦(01299)半日逆市升1.8%，金融股中表現最好。但內銀跟內險股下跌，之前有傳言指內地出現大量斷供房，但深圳金融監管部門澄清消息與事實嚴重不符，可惜未能為內銀股護航，內銀股走軟。而內地水災或引發大量理賠，內險股近日亦走弱。

ATMJB跟返隔晚中概股走勢，今日全線向下，阿里(09988)將於收市後公布業績，股價績前跌1.7%，其他科網股普遍跌1%以上，只有騰訊(00700)跌0.2%，叫做跌得少。創科(00699)公布上半年少賺18%，半日股價急跌18.2%，一隻藍籌股可以半日跌近兩成，你話家下恒指有乜辧法唔成日玩過山車。

高盛稱澳洲液化天然氣開發項目罷工，或令液化天然氣(LNG)供應大幅減少，電廠可能增加煤炭用量，本港相關石油股跟煤炭股逆市造好。另一個逆市造好嘅板塊係內地電訊股，聯通(00762)公布中期賺124億人民幣，派息亦增23%，半日升3.3%，藍籌之中表現最好；今日派成績表嘅中移動(00941)，半日升0.9%；只有中電信(00728)跌0.8%，表現較為失色。

內房股負面消息不絕，繼碧桂園(02007)爆雷，或成恒大2.0後，今日輪到富力(02777)表示因資金緊張，導致商票逾期，股價半日跌7.6%；其他內房股閒閒地跌2%至超過半成。話咗內房股不能沾手，即使偶有反彈亦唔好貪小便宜，好容易因小失大。

麥狄文
(徐狄怡‧證監會持牌人)