港股直擊 | 2023-08-03 14:23

【盤房來料】港股整固成交縮 投資者未肯大手買貨

美國被惠譽下調長期信用評級至AA+，美國10期債息回升，市場避險情緒增加，美股隔晚回落，三大指數向下，納指更跌逾2%。港股噚日下跌近500點，今早恒指再低開113點，但內地財新7月份中國服務業PMI報54.1，好過市場預期，帶動恒指反彈倒升55點，見19573半日高位後又回軟，最多跌148點，見19369半日低位後喘定回升，但暫時仍未能收復10天線(19521)及50天線(19542)。

恒指半日收報19506，跌11點；國指升1點，報6671；恒科指升20點，收4409。半日成交額525.9億元，又回復呆滯。

藍籌股個別發展，重磅科網股亦然，ATMJB表現不一，阿里(09988)、京東(09618)跟百度(09888)半日跌逾1%，但美團(03690)則升0.3%，騰訊(00700)更錄得1.6%升幅。金融股窄幅上落，大笨象(00005)績後續回吐，半日跌0.6%；不過友邦(01299)反彈，升0.3%；港交所(00388)止跌回穩，升0.1%。表現最好嘅藍籌股係創科(00669)，半日升近5%；相反表現最差係早前大幅反彈嘅碧服(06098)，跌3.7%，未能守穩雙位數，10元呢個阻力未能突破企穩又回落；同系碧桂園亦跌1.3%。其他內房及物管股普遍偏軟，繼續有波幅，冇升幅。

恒大系陸續復牌，今日輪到恒大物業(06666)復牌，半日跌46%，少過一半算跌得少；日前復牌嘅恒大汽車(00708)由低位反彈至2元水平未能企穩，今日又顯著下跌逾一成，半日跌12%。不過電動車股造好，當中以蔚來(09866)半日升8%最厲害，小鵬(09868)升4.5%，理想汽車(02015)升逾3%；比亞迪(01211)亦錄得1.2%升幅。

港股興奮過後，今日成交額又顯著回落，全日能否保持過千億仍屬未知數，不過港股由7月低位約18200水平反彈，直至升至20000水平，方見成交額回升，只能夠講係因為股價向上，令成交額增加，但成交量方面，其實未見顯著增加，由18200水平反彈至20000水平，港股一直未能符合價量齊升呢個條件。

大摩就出咗份報告指出，雖然7月份的政治局會議發出更多鴿派訊號，投資者嘅信心仍然非常脆弱，加上投資者對3月份以嚟所推出嘅寬鬆措施感到失望，因為相關措施平淡且乏力，未能解決地方政府財政、失業率高企及內房債務等問題。喺中國仍面對結構性挑戰下，加上中美地緣政治局勢仍緊張，此等問題未改善，投資者仍唔願意大規模配置中國股票。喺咁嘅情況下，中港股市無新資金流入，要走出上落市困局進入大牛市行情，似乎仍然係比較遙遠嘅事。

麥狄文
(徐狄怡‧證監會持牌人)