2023-07-31 00:00

專訪

田北辰促經濟政治河水不犯井水鄭雁雄言論如強心針 紓緩社會氣氛

自從內地知名博客「靖海侯」7月初批評本港政壇「寧左勿右」，再到中聯辦主任鄭雁雄月中寄語港府「理性務實看監督」，不少人都期待本地政圈能否颳起新氣象。以開明建制自居的立法會議員實政圓桌田北辰日前接受本報專訪時表示，中央過去多強調議員要支持特區政府施政，較罕有提到監督一詞，因此鄭雁雄的說法對他如「強心針」。田北辰承認，現時確有左傾風氣，預料需時間重返平衡，本港亦要維持「一國兩制」獨特性，經濟及政治應繼續「河水不犯井水」。

田北辰憶述，過去數年，中央不同層級官員每當提到港澳政策時，都強調要落實「全面管治權」，這說法令外界理解成「成個概念即係全面中央話晒事」。鄭雁雄最新講話則表明，中聯辦「主要角色依然是聯絡服務」，田北辰認為，當中聯辦主任說明其角色是聯絡，而非管理香港事務，足已紓緩現時社會氣氛。「我好喜歡佢講呢句嘢、至少佢肯講，very timely（非常合時）同埋好重要……對我嚟講係強心針」。

政治環境「寧左勿右」

鄭雁雄在講話中提到，監督需下苦功，「過猶不及、不及也是過」；田稱在如今政治環境「寧左勿右」下，「成個政治光譜就偏向保守，咁咩叫保守？咪盡量唔好反對咁多囉，你可以講幾句，咁去到最後咪支持呀舉手咁囉；批評嘅聲音就適可而止呀咁樣囉。」他說，政治環境雖有變，他仍會堅守原則，遇上不認同的政策就說不，「我個手同個口係一致嘅；我一係就棄權一係就反對，但我唔會去做啲嘢拖垮政府。」

田北辰曾就簡約公屋撥款一事要求記名表決，惹來部分建制派議員微言。他透露，曾有人勸說他不要提出記名點票，但他堅持議員有權要求記名表決，「既然係選民代表，佢嘅立場應該清晰話畀選民聽，如果你冇咗記名表決，其實個選民係唔知你做咗啲乜嘅，因為你個口可以講好多嘢，咁個手到底有冇跟呢？」他又說，當簡約公屋撥款有表決結果後，很多市民向他反映，對投票結果感詫異，「如果有十幾票反對，啲人係會覺得正常，當日係有咁多人問嘢，就算冇十幾票反對都有十幾票棄權，但而家唔係吖嘛……（議員）問又問咁多，結果又全部一面倒支持，而家所謂『寧左勿右』，咪就係咁嘅意思囉。」

開明建制被視壞孩子

他自言，作為開明建制，當政治氣氛轉趨保守，自己亦會受累，「當成個（政治形勢）鐘擺偏去左嘅時候呢，好多嘢由開明變咗『壞孩子、二五仔』」；但他相信，有關情況會隨時間而改變，「鐘擺效應、一定會返番嚟嘅」，惟他估計或需長達數年時間。

田北辰在訪問中強調，本港獨特性在「一國兩制」，從商與政治理應不掛鈎，近日在立法會與各國駐港領事會面時，「佢哋個perception（印象）好似改咗喇，（質疑）係咪仲係以前嗰個香港，河水不犯井水？河水就做生意、井水就係政治。」他認為，雖然領事未能提出確切理據，證明在港營商是否已政治掛帥，但希望當局以行動釋除有關人士疑慮，「唔好將經濟做生意嗰班，同政治撈埋一齊。」

對於「一國兩制」，田北辰直言自己的理解是「愛國嘅人係愛國家，但係咪一定話，你唔擁護內地制度，你就不愛國呢？呢個係好大debate（辯論）；如果我一定要深愛內地嘅制度，我使乜要『一國兩制』？我擺明愛我哋香港制度、但我又愛國家，都冇觸犯『一國兩制』吖？」

採訪、撰文：林嘉希、張家灝