港股直擊 | 2023-07-19 14:33

【盤房來料】港股平均線盡失 跌勢加劇

美銀跟摩通出業績，市場收貨股價又升，帶動美股氣氛向好，加上微軟公布Office 365 Copilot定價，仲會加推AI功能訂閱服務，市場視為未來盈利增長亮點，股價創新高，美股三大指數造好。內地經濟數據強差人意，人民幣滙價再走軟，加上恒大天文數字嘅負債，令市場再度關注內房危機，港股延續昨日跌勢，今早一度再跌300點。

恒指低開189點，跌幅一度收窄至146點，見18869半日高位，但10天線(18857點)再失守，跌勢轉急，半日最多跌304點，見18711半日低位。恒指中午收報18782，跌233點；國指半日跌83點，報6316；恒科指跌70點，報4058點。半日成交額549.5億元，穿咗萬九點，都係咁上下成交，暫時未見有大量買盤出嚟趁低吸納。

人哋美股嘅科技股就日日向上，我哋港股嘅科網股就每況愈下，呢幾日連日下跌，ATMJB半日全線向下，阿里(09988)半日跌少過1%算最好，美團(03690)及京東(09618)齊齊跌逾2%；騰訊(00700)主要股東南非基金繼續減持，加上又因為業績期前要停止回購，半日跌逾2%。百度(09888)半日更跌逾3%，網易(09999)跟攜程(09961)半日跌1.7%。單係呢堆科網股下挫，已佔去大市近一半跌幅。

金融股之中，大笨象(00005)一枝獨秀，半日再創52周高位見63.25元，逆市升0.1%；其他金融股則全線向下，友邦(01299)跌2%，港交所(00388)亦跌0.8%。內險股沽壓較沉重，平保(02318)半日跌2.1%；國壽(02628)表現更差，跌逾4%，仲有邊個記得國壽喺2007年曾經係股王，以除淨前股價計算，由每股10蚊唔夠炒到上每股高過50元。阿Man提返起國壽以前嘅威水史，係想大家明白，唔係全部股份都可以守到返家鄉，一代股王亦可以淪落，要保本同長期作戰，買乜嘢股都要有個止蝕位，唔可以無底線咁無了期等待。

除咗大笨象逆市上升，中海油(00883)跟中石油(00857)半日亦分別逆市升逾1%。至於最差嘅藍籌股係信義光能(00968)，半日跌逾半成。內地降級消費下，消費股亦捱沽，安踏(02020)、申洲國際(02313)跟李寧(02331)齊齊向下。

唔少人認為阿Man係大淡友，其實睇見內地嘅經濟數據，仲有最大產業鏈內房產業嘅狀況，都無辦法唔睇淡，由年初1月延伸至今嘅跌浪，每次反彈浪頂一浪低於一浪，唔係阿Man要唱淡後市，事實擺在眼前，外資撤走後，缺乏資金支持下，中港股市確實係浪低於浪。較早前嘅反彈，又係喺100天線前行人止步，暫時恒指已失全部移動平均線，即使短線18800有支持，守住10天線，但未能重上萬九大關，收復20天線，短線港股都係瓜多過菜。

麥狄文
(徐狄怡‧證監會持牌人)