港股直擊 | 2023-07-10 13:59

【盤房來料】港股未能借阿里消息企穩18800水平 短線易跌難升

上周五美股表現反覆，公布大非農數據不似預期，早段美股高開，但中段由升轉跌，三大指數報跌收市，畢竟美股現水平先入場嘅值博率一般，上升動力減弱，能夠企喺現水平整固已經算唔錯，要有心理準備，隨時出現較大幅度調整。至於反映中概股表現嘅金龍指數升逾3%，主要係人行上周五宣布向螞蟻集團罰款71億元人民幣，市場解讀為整改完成，阿里最壞時間已過，不明朗因素消除，有機會再作估值重評。阿里(09988)當時股價喺美市升逾8%，帶動中概股，夜期及ADR升逾300點。

恒指上周跌逾千點後，今早高開381點，升幅一度擴大至415點，見18781半日高位，不過內地公布6月CPI持平，PPI連跌9個月差過市場預期，大市升幅愈收愈窄，落到半日低位18467，僅升102點。恒指中午報收143點，報18509；國指升43點，報6241；恒科指升48點，報3950，開市曾重返4000大關，可惜此關得而復失。

人行宣布對阿里旗下螞蟻集團跟騰訊(00700)嘅罰款，市場認為係對科企減管結束，但阿Man又唔係咁睇，阿爺之前對科企已罰款多次，罰完又罰，如今再對兩企罰款，唔等於對科企放任不管，反而係監管常態化，目前罰完呢一輪，只可以話短期監管壓力有所紓緩。呢頭被人行罰錢，阿里周末再出通告，指螞蟻有意回購7.6%股份，其回購價反映螞蟻估值約為5671億元人仔，呢個估值大約係兩年前IPO估值貶值七成。唔知係咪呢個舉動，令阿里今早高開低走，雖然早段股價上到89元，90元影都無見過，回補上月個下跌裂口之後，又再拾級向下，半日升幅收窄至3%左右。其他科網股未見特別出色，升幅由1%至2%不等，只有阿里半日能升超過3%。

金管局上周五宣布放寬自用住宅物業按揭成數，不過本地地產股未見受惠，只有恒地(00012)跟長實(01113)半日上升，新地(00016)跟新世界(00017)半日逆市下跌。其實放寬按揭成數，唔代表樓會賣多咗，畀買家借多啲，都要買家負擔得起，供款額多咗，都要過到銀行壓測，先有銀行肯承造按揭，所以呢個所謂放寛，並唔會對樓市交投帶嚟太大刺激。

至於內房股表現更差，佳兆業(01638)尋求法律措施堅決反對清盤申請，目前半日跌逾一成，拖累整個內房板塊走軟，內房股全線逆市下跌，跌幅由超過1%至4%不等。藥明生物(02269)又宣布玩分拆，不過市場唔賣佢帳，股價高開後即回，半日倒跌收市。

港股今日雖借阿里消息反彈，不過成交仍然薄弱，加上18800由之前嘅支持變為阻力，喺失守短期上升軌及多條移動平均線下，易跌難升，今日若然未能企穩18500點收市，上周低位18300水平凍過水，只有繼續向下尋底。