港股直擊 | 2023-06-26 13:52

【盤房來料】月底半年結粉飾櫥窗力守18800短線支持

鮑爺繼續放鷹，美股上周五偏軟，加上俄羅斯有僱用兵發生判變，雖然事件好快平息，但俄羅斯目前局勢仍相當唔穩定，令美元走強，人民幣兌美元一度見7.23後反彈，港股上周跌逾千點後，今早低開後，好淡爭持，暫時缺乏方向。

恒指低開44點後，一度反彈最多111點，見19001半日高位，但萬九關未企穩，半日最多跌122點，見18767半日低位。恒指半日跌27點，報收18862；國指半日升8點，半日報收6402；恒科指半日報3890，升10點。半日成交額僅451.76億元，北水回歸亦未能帶動成交回升。

藍籌股個別發展，友邦(01299)半日跌1.6%；港交所(00388)亦跌1.5%；大笨象(00005)則跌0.2%。內地金融股方面，建行(00939)跟招行(03968)逆市升0.4%及0.7%；不過平保(02328)跟工行(01398)則隨大市向下。重磅科網股表現好壞參半，ATMJ只有阿里(09988)逆市升0.1%；騰訊(00700)半日跌近0.6%；美團03690)跟京東(09618)分別跌0.4%及2.2%。

不過生科股今日逆市做好，上市生物科技指數彈升3%。上周因為管理層調低今年銷售預測而大跌兩成的藥明生物(02269)，今日卒之反彈，不過半日僅升2.1%，相對累積跌幅，呢個反彈力度無乜睇頭，短線反彈阻力大約40元，博反彈嘅見好要識收。騰盛博藥(02317)跟康希諾生物(06185)旗下藥物及疫苖均有利好消息，兩股半日齊齊升逾一成；其他生科股普遍做好。

另一個表現較佳嘅板塊嘅中資電力股，內地焦煤合約急跌6%，火電股有望減輕成本，華潤電力(00836)半日升近7%，成為表現最好藍籌股；其他內地電力股，普遍錄得半成以上升幅。

港股經過上周跌逾千點後，走勢明顯轉弱，之前阿Man喺20000水平已再三提醒，恒指未能進一步突破100日線並企穩，小心由5月低位18000水平反彈至20000水平嘅反彈已告一段落，大市隨時調頭回落，結果大市已先後失守多條移動平均線，連19000關亦不保。純以技術走勢分析，港股大有機會再展開另一個跌幅，再一次考驗5月份低位，並繼續向下尋底。不過本周四期指結算，加上6月底為基金半年結，唔排除喺「粉飾櫥窗」效應下，仍會力守18800短線支持。

麥狄文
(徐狄怡‧證監會持牌人)