即巿股評 | 2023-05-24 13:34

【盤房來料】失守多條平均線 港股低處未算低

美國債務上限問題，預咗唔到6月1日死線大限都唔會有結果，兩黨為咗爭取最大政治籌碼，必定去到最後一刻先會達成協議，死線之前雙方唔會肯讓步。受呢個問題困擾，美股借勢回吐，隔晚三大指數下跌，拖咗個ADR同夜期落去，再加上今早人民幣創半年新低，港股跟埋A股齊齊下跌，恒指跌至兩個月低位。

恒指低開151點，跌幅一度收窄至127點，見19304半日高位，但人仔走弱，港股沽壓更大，最多跌274點，見19158半日低位，更跌至兩個月新低。恒指半日跌183點，收報19248；國指報6532，跌71點，恒科指跌45點，收3811。半日成交額只有442.31億元，市況持續淡靜。

藍籌股普遍走軟，友邦(01299)、大笨象(00005)跟港交所全線向下，跌幅少過1%，但內銀、內險等內地金融股就跌幅較大，全部跌超過1%。今日派成績表嘅聯想(00992)半日跌3.7%，業績前未見炒上，有別於科網股業績前又引人落搭。海底撈(06862)半日跌近半成，為表現最差藍籌股；相反表現最好嘅信義光能(00968)半日升3.6%。

科網股全線向下，除咗公布業績前已炒起嘅快手(01024)，半日仍維持升幅，只係今日都開始唔係好炒得郁，之前兩日升咁多，業績後無見光死都算係咁。AMTJB全線向下，全部跌幅超過1%，小米(01810)業績前炒唔起，今日公布業績，股價半日跌1.7%。呢期內地嘅雲服務收費相繼減價，金山雲(03896)公布業績虧損擴大，面對未來服務或要減價搶佔市場，真係唔知幾時可以扭虧為盈，股價半日插水8.1%。

人仔持續走弱，對人民幣匯價敏感嘅內房股連日插水，中國海外(00688)跌足九個交易日，半日再跌2.1%。其他內房股全線下跌，跌幅由不足1%至近半成不等。除咗內房股，濠賭股亦見沽壓，人民幣走軟對佢哋嚟講當然非好事，內地客仔身家縮水，濠賭股生意難撈，整個板塊今日走軟，跌幅閒閒地超過3%至近半成不等。

港股已失守多條移動平均線，持續向下尋底係意料中事，今個星期又長周末，下周二期指結算，大市呢一刻隊到咁低，似乎淡友想喺呢個月贏到盡。不過一旦五窮過後再六絕，咁就低處未算低，始終失守咗19400至19500呢啲大位，都好大機會下試18800至19000，有心買貨唔使急，睇返家下嘅成交，大戶都仲未肯入場撈貨，我哋一般散戶更無謂做先頭部隊。

麥狄文
(徐狄怡‧證監會持牌人)