港股直擊 | 2023-05-03 14:22

【盤房來料】港股失守250天線 走勢每況愈下

美股喺聯儲局議息前夕偏軟，加上第一共和銀行破產被收購後，市場再憂慮美國地方銀行財政問題持續，隔晚美國地方銀行股顯著下跌，影響市場氣氛，美股三大指數下跌，全部跌幅超過1%。至於港股，隔晚喺夜期及ADR已隨美股下跌，今早恒指一度跌近400點，失守250天線(19718)，恒指目前處於幾條主要平均線之下。

恒指低開247點，報19686，跌幅雖然一度收窄至211點，見19721半日高位，可惜250天線終不保，最多跌395點，見19538半日低位。中午恒指收報19585，跌348點；國指則跌127點，報6552；恒科指跌92點，報3805。半日成交額只有383.28億元，北水缺席下，成交進一步萎縮。

藍籌股整體受壓，即使大笨象(00005)噚日公布的業績不俗，派息及恢復回購曾支撐股價噚日下半場造好，無奈今日不敵大市跌勢，半日跌0.6%；友邦(01299)更隨美國金融股走軟，跌逾2%。ATMJ全線向下，京東(09618)上周創上市新低後，反彈乏力，半日再跌逾3%，四大科網股中表現最差；騰訊(00700)跟阿里(09988)半日則跌超過2%，阿里盤中一度跌穿80元，目前險守此水平。

阿里股價已重返其未公布重組及分拆業務計劃之前嘅水平，望返轉頭，阿里公布嘅所謂好消息，原來只係為咗方便主要股東軟銀有個靚啲嘅價走貨，散戶信佢個改革計劃而追貨，又做咗大戶點心被割韭菜。京東情況亦差不多，自公布有意繼續分拆業務後，股價閃見150元樓上水平後便無影，接住就見到劉強東減持，散戶又慘被割韭菜，中概股好消息被大戶出貨，以後要投資者再信中概股真係有難度。美團(03690)股價半日跌1.7%，暫時守住130元水平算係咁。

五一黃金周香港呢邊就旺丁唔旺財，澳門情況可能都係咁上下，濠賭股喺五一假期前炒上，家下回返都合理。金沙(01928)半日跌5.3%，成為表現最差藍籌股；其他濠賭股跌幅由5%起跳，只有銀娛(00027)跌2.2%，算係跌得少。其他藍籌股普遍偏軟，唯獨百威(01876)業績前股價逆市造好，半日升近3%，係表現最佳藍籌股。

之前強勢嘅石油股終腳軟，油價見五星期低位，三桶油跟油服股下跌，跌幅閒閒地超過3%。相反金價向上，重返2000美元水平之上，金礦股逆市造好，不過阿Man都係嗰句，切忌高追，睇好金價繼續造好，想買金礦股都忍忍手等股價回調先考慮。

麥狄文
(徐狄怡‧證監會持牌人)