港股直擊 | 2023-03-31 15:10
歐美銀行危機未有進一步蔓延開去,加埋第一季季度結粉飾櫥窗效應,全球股市整體三月都表現唔曳,尤其納指100指數已由低位回升兩成牛市門檻(截至昨晚累升24.2%),看似抹走熊市衰氣,但顯然絶對不是。
若放大納指100指數細看,其實離不開上落區間。隨著債息或會進一步下移,納指100或會升至去年高位13720點,但問題是衰退近在咫尺,廣告是大型科技股收入主要來源,衰退背景下廣告收入必受影響,因此只宜炒上落方式操作。
似乎全球股市第二季只會區間徘徊居多,波幅更會進一步收窄,原因是銀行危機根本問題未解除,加上經濟環境隨著息口高企下轉差,銀行只會「落雨收遮」減少信貸風險。市場缺水下,成交只會持續萎乾,令大市波幅會越來越窄,帶來全球股市一個大悶局。
股市要迎來一個重大方向,無非是經濟重拾增長(股市上升),或是突然出現重大危機(股市急挫),但前者已共識較難實現,反而息口已升到4.75至5厘,銀行業已內傷下,難免會醖釀經濟危機。
不過,股市次季初又未必會急瀉,原因是經濟數據仍唔大曳,就以昨晚美國上季GDP增長(修訂)為例,依然有2.6%升幅,最新失業率也只有3.6%,仍然處於低水平,加上失業率每個月才只會公布一次,令投資者在等待數據時不敢輕舉妄動,因此好難觸動市場沽貨情緒。
之不過,近期美企炒人已成為一種風氣,按過往數據軌跡,失業率可突然升得又快又急,一旦如此,股市將會進入新一輪急速跌浪。
目前市況咁悶應該做D乜?就喺明知衰退臨近,聯儲局最終都要減息救市,即利好債市,故在目前未減息前,等個靚價後買入國債ETF TLT,維持100美元樓下買入,中線睇120美元,失守95美元止蝕。
編按:作者尹德政(Ricky),醉心投資美股近十載,最大滿足感來自尋找抵買有實力的世界行業領袖,每逢周五在「信報網站」及「港股360」撰文。