即巿股評 | 2023-03-30 14:46

【盤房來料】港股暫守二萬關 20天及250天線不容再失

隔晚美股向好，市場靜候國會再推出新存款保障方案， 金融股帶動美股上升，道指升323點；標指重返4000水平，升56點；納指亦無理會債息向上，升210點。雖然噚日港股成交回升至1400億之上，但喺20000水平嚟講，呢個成交都未能配合到升勢。即使美股隔晚造好，港股兩日升逾600點後，今日回吐，暫時仍守在20000關之上。

恒指高開24點，早段曾升107點見20300半日高位，可惜缺乏承接，一度倒跌最多174點，見20017半日低位，但20000見支持，半日跌幅略為收窄。恒指中午收報20053，跌138點；國指跌64點，報6814；恒科指跌47點，報4198。半日成交額666.94億元，似乎噚日嘅1400億成交額，今日都難以達到。

藍籌股個別發展，隔晚美股嘅金融股升得勁，但香港呢邊嘅表現平平，友邦(01299)半日跌0.7%；大笨象(00005)叫好啲，但都只係升0.6%。內險股表現更差，國壽(02628)去年盈利跌37%，股價半日跌6.5%；其他內險股跌1.5%至4.1%不等。至於ATMJ半升半跌，美團(03690)跟騰訊(00700)半日跌0.9%，阿里(09988)跟京東(09618)半日分別升0.8%及0.5%。

至於中石油(00857)，去年多賺62%刷新紀錄，股價半日升4.6%，為最大升幅藍籌股。線上醫療股受壓，阿里健康(00241)半日跌近一成，藍籌之中包尾，其他板塊內股份走弱。相反今日煤炭股就逆市走強，板塊內股份升超過1%至4%不等。

目前港股叫做企咗20天線同250天線兩三日，走勢係應該有所好轉，不過今日期指結算後，留意呢兩條線是否再度失守，始終港股成交唔配合，短暫升勢不過係大戶挾高指數結算，港股暫未擺脫上落市格局。個別板塊輪流落鑊，都係短炒為主，走得快，好世界。

順豐同城受惠平台混戰

內地嘅本地生活市場大混戰，之前因為抖音有意搞外賣團購等業務，搞到美團(03690)股價當時曾急跌一成，自此之後，美團股價由160元水平之上急跌所遺下嘅裂口，跟住已經無咗影。相反喺呢堆平台混戰之際，其實係有公司受惠，借呢場混戰快速成長。順豐同城(09699)早於2022年已先後與抖音、微信等平台達成合作協議，成為首批接入抖音「團購配送」嘅主要即時配送服務商，又持續深化與微信嘅合作接入微信生態。以順豐同城嘅外送解決方案助相關平台實現外賣服務實際由「食店」送「到家」嘅全面覆蓋，同時跟多個戰略合作方案探索嘗試新合作場景。

順豐同城作為規模較大嘅第三方配送商，當然受惠愈嚟愈白熱化嘅生活服務市場混戰所帶嚟嘅商機。順豐同城未來可藉其解決方案，賦能予呢啲有意進入本地生活市場嘅平台企業，從而增加收入來源。順豐同城剛公布去年全年業績，營業額102.65億元(人民幣，下同)，按年升25.6%；虧損收窄68%至2.87億元，表現好過市場預期嘅3.57億元；每股虧損0.31元，不派息。截至去年12月底，年活躍消費者持續擴大至逾1560萬，按年增47.5%。

展望未來，順豐同城將與更多商流平台合作，To C業務(同城配送服務 - 對消費者業務)用戶滲透率逐步提升，並預計同城配送業務收入將持續保持高於行業的增長，結合最後一公里配送業務，末端配送網絡隨規模提升持續降本增效，利潤率將得以持續改善。To B業務發展良好，面向「商家」的同城配送收入增長19.8%至近46.5億元。公司表示主要是年內以開放包容的網絡以及全場景的配送解決方案受商家喜愛，大大增加商家合作量；2022年平台上的年活躍商戶規模達33萬，按年增長27.7%，累計服務品牌客戶逾3600個，收入均按年增長逾一倍。以現價計算，順豐同城嘅估值較同業低，其市銷率為1.08倍，相對美團(03690)3.55倍及達達1.93倍，存在折讓空間，有條件追落後，可惜係此股一向交投唔算活躍，一直被市場忽視。

阿Man3月31日開始放大假，至復活節後先返，祝各位假期愉快！

(徐狄怡‧證監會持牌人)