即巿股評 | 2023-03-23 14:30
雖然美國聯儲局一如市場預期,只加息0.25%,但鮑爺記者會上放鷹,指如有必要,息率或會提升至較預期高嘅水平,仲話減息唔喺聯儲局預期基本情景之中,潛台詞就係今年未必會減息。市場本來憧憬今年減息,現在希望幻滅,再加上財長耶倫表示無意再擴大存款保險額度,只承諾繼續為有需要嘅銀行提供流動性,美股尾市急跌,三大指數跌逾1%。美匯指數走弱,人民幣相對走強,離岸價更升至逾一個月高位,推動港股今日繼續回升,半日升逾百點,但目前仍受制250天線(19849點)及20天線(19829點)。
恒指高開28點,一度升逾百點後回落,曾倒跌67點,見19523半日低位,略穿100天線(19554)但未有考驗10天線(19412)。人民幣走強,加上美期反彈帶動,港股止跌回升,半日最多升191點,見19782半日高位。中午恒指收報19743,升152點;國指報6701,升61點;恒科指升64點,收4074。半日成交額630.26億元,未見顯著增加。
藍籌股個別發展,隔晚美股嘅金融股顯著受壓,早段大笨象(00005)跟友邦(01299)走弱,友邦更跌穿80元水平,兩股中午收市前跌幅收窄,大笨象持平,友邦跌幅收窄至0.4%。騰訊(00700)噚日收市後派成績表,雖然成績表無乜驚喜,但股價半日升5.6%,挾死晒造做淡騰訊嘅淡友,半日為大市貢獻89點升幅,超過半日恒指升幅的一半。ATMJ其他三成員全線向上,京東(09618)表現較落後,半日升0.5%;阿里(09988)跟美團(03690)升逾1%。東方海外(00316)半日急升近18%,去年多賺四成,兼且連特別股息共派4.56美元,成為表現最佳藍籌股。不過李寧(02331)跟安踏(02020)半日逆市下跌,分別跌0.5%及1%。
美滙指數回落,金價隔晚回升,金礦股回勇,招金(01818)反彈7.4%,其他金礦股跟金股ETF,反彈超過4%至5%不等。雖然今年減息應無望,但科網股今日表現唔錯,但同樣對息率敏感嘅生科股就無咁好彩,半日普遍逆市下跌。燃氣股跟教育股同樣逆市下跌,沽壓甚大,整個板塊內股份,閒閒地跌2%或以上。
雖然港股連升三日,市場氣氛似乎有所改善,不過美國銀行風暴未能肯定已完全結束,一旦美國再有中小型銀行爆鑊,定必影響投資情緒,而港股升勢欠缺成交配合亦係另一問題。個股只有以快打慢,短炒有糊要食,坐定定等長升長有嘅日子已過去,尤其北水亦一改過往作風,傾向短炒嘅資金佔多數,大家都係走得快,好世界。若然大市重上20000水平而未能企穩,可能又係減磅套現嘅時間。
麥狄文
(徐狄怡‧證監會持牌人)