港股直擊 | 2023-03-21 14:03

【盤房來料】歐美金融股危機下 市場信心脆弱

雖然瑞士政府逼令瑞銀收購瑞信，叫做暫時紓緩銀行業信心危機，美股隔晚反彈，但今日唔知明日事，尤其瑞信嘅AT1債券可以一夜之間歸零，市場對銀行業信心危機邊有咁快回復，港股今早反彈但亦有心無力，缸邊友亦無心戀戰，半日成交額竟低至不足500億元，恒指半日波幅不足200點。

恒指高開118點，其後一度升209點，見半日高位19210，但無人願意入場，乏承接力下，升幅一度縮至17點，見19018半日低位。中午恒指升62點，報19063；國指跌7點，報6462點；恒科指升11點，收3881。半日成交僅496.22億元。

大市乏善可陳，大笨象(00005)因為銀行風暴連跌3日後，半日反彈2%；友邦(01299)半日彈2.8%；平保(02318)升0.8%。ATMJ全線下跌，京東(09618)半日跌2.8%，藍籌之中表現最差，主要係對手拼多多公布上季收入差過預期，股價急跌近一成半，咁京東同阿里(09988)股價跌都係正常。其他藍籌股升嘅無乜力，跌又唔跌得多，始終港股跌到咁殘，再狠狠沽落去亦無乜意思，但又無資金肯入場買貨，自然升亦唔夠力水。

由於美債息持續回落，有利生科股呢類息口敏感股，整個板塊今日有返啲反彈，藥明生物(02269)半日急彈6.8%，成為表現最好藍籌股，其他生科股亦錄得超過2%至6%升幅。軍工股今日繼續有追捧，內地有報道指，鼓勵軍工企業做強做優做大，中船防務(00317)半日升3.8%，中航科工(02357)更升逾半成。

中字股炒到今日反而逆市向下，就連最強嘅中字電訊股都要逆市跌，其他中字股回吐，主要係睇見成交，都見到無資金願意入場，市場缺水，自然易跌難升。港股近日係日升日跌，基本上喺外圍風雨飄搖下，外圍嘅金融股人人自危，市場焦點仍然放喺歐美金融股到，一日市場信心未回復，資金都唔願意投放入股市，更何況係較歐美市場更少機會搵食嘅港股。暫時只有睇住事情發展，要待市場信心回復，港股先有機會扭轉目前唔生唔死嘅局面。

麥狄文
(徐狄怡‧證監會持牌人)