即巿股評 | 2023-02-23 13:45

【盤房來料】餐飲股調整完成 升勢有望持續

隔晚美股反覆偏軟，不過科技股倒是喘定，即使聯儲局2月份會議紀錄暗示要繼續加息，以壓抑通脹，但納指隔晚反而升14點；但標指則連跌四日，道指亦倒跌收市。不過人民幣止跌回升，港股兩日跌463點後，今早回穩，半日升逾百點，目前喺20500水平爭持。

恒指低開84點，早段一度跌97點，見20325半日低位；之後因人民幣回勇，港股掉頭回升177點，見20601半日高位，其後升勢回順，但半日仍錄得逾百點升幅。恒指半日收報20534，升110點；國指升77點，報6910；恒科指升85點，收4185。半日成交額只有570.12億元，又較噚日縮返水，始終成交未成氣候，未見有新資金流入。

藍籌股普遍造好，內銀跟內房股表現唔錯，建行(00939)半日升0.2%、工行(01398)升0.8%、國壽(02628)升0.4%；阿Man一直較為睇好嘅平保(02318)升2.1%，表現最好。港交所(00388)中午公布全年業績，按年盈利退倒近兩成，全年減息亦減兩成；股價半日升1.2%，且看午後股價反應如何。不過去年成交額縮水亦正常，今年中港兩地復常，預料今年嘅成交額唔會差得過舊年，炒股係炒公司嘅未來，加上噚日都講過港交所喺320元有不俗支持，今日呢份業績應該唔會點拖累午後股價表現。

至於表現最差藍籌繼續係創科(00669)，Jehoshaphat Research發表報告正沽空創科，報告指其潛在跌幅達60%至80%，拖累股價半日再跌4.5%。不過對於呢個報告表示創科因為有巨大潛在跌幅而沽空，阿Man唔會因此而追沽創科，尤其愈多沽空，愈大機會喺空倉回補時，股價挾到爆廠。

至於科網股今日整體反彈，ATMJ全線回升，騰訊(00700)跟美團(03690)半日分別升1%及0.3%；京東(09618)跟阿里(09988)半日則升逾2%。雖然百度(09888)噚日收市後公布業績，股價喺美股盤前急升，但至美股開市又回軟，倒跌收場，今日股價低開後，隨大市回升，半日倒升0.4%。其他科網股普遍回升，睇返ATMJ有望短期見底，不過陸續公布業績，仲要睇下市場對佢哋嘅業績有乜嘢反應。

另外，今日煤炭股隨焦煤價格上升造好，板塊內股份至少升2%，兗礦(01171)半日更升6.4%。相反，由於焦煤價上升對火電股不利，相關股份半日走軟，跌幅由0.8%至最多4.5%不等。呢兩個板塊一向唔係阿Man杯茶，升升跌跌都只係旁觀。內地餐飲股今日有追捧，除咗百勝中國(09987)未見深度調整，一直高位震盪之外，其他餐飲股之前由高位已調整唔少，今日開始見底回升，升勢有望持續，值得留意。

至於臨近期指結算，指數仍然喺低位徘徊，似乎有無形之手因為轉倉而壓住指數。大市自去年十月探底回升，連升四個月，累積逾五成升幅，回調亦屬正常，而250天線，大約20000水平，估計係呢一次回吐嘅重要支持，而回吐期間，大市亦已回補上升裂口，僅餘20200裂口尚未回補，若然喺結算前呢兩日補埋呢個裂口，守住250天線，大市下月回升亦合理，目前只欠成交仍然淡薄未能配合，反正250天線能守嘅話，現水平開始收集股份，進可攻，退可守，亦係一個理想切入點。

麥狄文
(徐狄怡‧證監會持牌人)