即巿股評 | 2023-02-20 14:00

【盤房來料】憧憬兩會有提振基建消息 可趁回吐吸納相關股

美股上周五表現繼續反覆，道指先低後高，收市倒升，但標指跟納指續跌，留意今晚美股假期休市，港股少咗個束縛，又可以亂咁嚟。與其話亂咁嚟，不如話港股今日唔使睇主美股嚟做，一心一意跟內地股市走，雖然早段低開，但見A股生生猛猛，港股亦先跌後回升。恒指低開38點，一度失守50日線(20743)，最多跌112點，見20606半日低位。甚後50日線失而復得，最多升180點，見20899半日高位。半日恒指升167點，報20887；國指升63點，報收7054；恒科指半日升47點，報收4305。半日成交額595.13億元，繼續呆呆滯滯。

藍籌股半日個別發展，竟然係盈富基金(02800)跑出成為最高成交金額股份，真係無乜幾可。至於ATMJ半日先低後高，騰訊(00700)跟阿里(09988)半日升0.4%；美團(03690)則升1.7%，只有京東(09618)略腳軟，半日跌不足1%，但失守210短線支持。至於另一隻呢期阿Man關注嘅百度(09888)半日升2.7%，短線140有不俗支持。大笨象(00005)明日派成績表，半日創52周高，見58.9元，不過一旦明日嘅成績表未能令大家滿意，咁大笨象掉頭嘅機會仍在，話晒頂咗喺呢啲位一段時間，只要業績公布有乜差池，掉頭向下亦好正常。至於表現最差嘅藍籌股，係舜宇(02382)，半日跌2.8%；金沙中國(01928)半日亦跌1.6%，主要係集團去年虧損擴大至15.82億美元，當然無息派，股價逆市走軟都合理。

中電信(00728)都創咗52周新高，有消息指集團將積極關注產業版ChatGPT，話咗呢個概念無咁快玩完，半日升5.1%。其他中資電訊股齊齊落鑊，中移動(00941)跟聯通(00762)都創咗52周高，半日分別升3.1%及4.3%。此外，中興通訊(00763)、中國鐵塔(00788)跟中通服(00552)均見炒作，但以股論股，都係三隻電訊網絡商股好過幾隻電訊周邊股份。

除咗中資電訊股，今日基建及建材股表現亦醒神，中國宏橋(01378)半日升逾一成，藍籌之中表現最好，中鋁(02600)跟中鋁國際(02068)半日分別升6.9%及10.4%；其他建材股及基建股，半日閒閒地升4%以上。呢兩個板塊嘅股份出咗名難炒，高追可免則免，不過市場憧憬下月兩會將有提新基建嘅利好消息或政策，估計呢兩個板塊呢啲時間會有得炒下，可以趁回吐時吼位上車。

麥狄文
(徐狄怡‧證監會持牌人)