港股直擊 | 2023-02-07 14:21

【盤房來料】港股反彈力度有限 成交未配合

上周五美國一個就業數據，就扭轉咗本來過份樂觀嘅美股投資者情緒，令市場重新意識到，雖然FOMC議息後未有放鷹，但唔代表緊縮貨幣政策會喺短時間內改變，美股隔晚繼續偏軟，三大主要指數下跌。不過港股連跌三日挫逾千點後，今早反彈返300點，但未有本事重返20天線，睇嚟調整之勢將持續。

恒指高開66點，一度見21282半日低位後，升幅曾擴大至290點，見21512半日高位，但距離20天線(21728)仲有較大段路，反彈似乎欠力度。半日恒指收報21399，升177點；國指升81點，報7270；恒科技升82點，收4547。半日成交額558.86億元，似乎呢啲位都吸引唔到資金積極買貨。

藍籌股普遍上升，但友邦(01299)半日偏軟無份彈，暫時叫守住85元短線支持位；但大笨象(00005)半日彈返0.7%，呢期表現算幾硬淨。至於內銀股及內險股今日反彈，不過升幅只限於1%左右。其他藍籌股反彈都係1%以內，要講較為厲害嘅，就係科網股，今日可以話係支撐住恒指嘅核心股份。當中以百度(09888)最勁，半日升14.4%，係最大升幅藍籌股，集團嘅ChatGPT項目，確認名字為「文心一言」，將會喺3月份完成內部測試後，再公開發布。

睇嚟AI人工智能會係今年一個炒作主題，待百度回調一定要收集作為持倉股份。另一具備CharGPT概念嘅美圖(01357)，半日亦大升17.2%，不過美圖上面層層蟹貨，要買呢個概念嘅股份，都係揀返百度，甚至美股嘅Google或微軟較穩陣。其他科網股都反彈，不過反彈幅度都係2%以內，加上成交唔多配合，短線仍有調整空間。

武漢動態調整住房限購範圍，內房股整體造好。唔少內房股今日都見反彈，反彈幅度由超過1%至4%不等。不過阿Man長氣都係講呢句，內房債務問題仍有待解決，若然銷售未能回復，內房股跟物管股，都只會係有波幅，無升幅，區間上落為主，暫時都好難回復當年勇。

港股經過幾日調整逾千點後，今日反彈力度麻麻，成交亦未能配合，睇嚟本輪嘅調整仍要持續，恒指都係先睇回補20800至21000嘅上升裂口，去到呢啲水平，可以考慮開始吸納重磅指數股，如港交所(00388)及AMTJ、百度、網易等股份，分段買貨。若然回補裂口未能迅速回升並重返20天線之上，調整持續，下一個位就係要睇返19800至20200點，日線圖營造大型頭肩底嘅右肩部份。

麥狄文
(徐狄怡‧證監會持牌人)