港股直擊 | 2023-02-06 14:17

【盤房來料】先回補20800-21000裂口

上周五美股因為非農就業人數增長遠超預期，市場再度憂慮FOMC今年持續加息，美滙指數反彈，美股三大指數下跌。加上中美關係因美方擊落中方無人飛艇轉趨緊張，港股上周跌逾千點後，今早跌勢持續。

恒指低開311點，報21349已屬半日高位，其後低開低走，跌幅擴大，半日最多跌574點，見21086半日低位。中午恒指報收21160，跌500點；國指跌218點，報7168；恒科指跌逾3%，跌172點，半日收4461。半日成交額765.98億元，沽壓話大唔算好大，但亦唔算無成交乾跌。

市場預期美國今年息口未必如之前所估計由加息周期切換至減息周期，藍籌股普遍下跌，只有友邦(01299)跟大笨象(00005)兩重磅指數成份股逆市上升，前者升0.47%，後者更升逾1%，成為表現最好藍籌股。相反對息口敏感嘅高增長股，科網股同生科股，今日跌勢較為顯著，半日恒科指跌咗3.7%，生科指更跌逾半成，藥明生物(02269)半日跌5.5%，信達生物(01801)更跌6.8%，其他生科股，閒閒地跌半成以上，至於製藥股，好似石藥(01093)同翰森製藥(03692)半日亦跌4%。

雖然友邦跟大笨象逆市上升，但其他金融股表現不濟，港交所(00388)半日跌4.9%，雖然港府致力爭取沙地阿美來港上市，成功嘅話會係一嚿大肥肉，但家陣十劃未有一撇，港交所自然未受呢個消息刺激。內銀股中，以招行(03968)半日跌4%表現最差，其他國有內銀股，半日跌0.8%至1.4%不等。內險股亦隨大市下跌，平保(02318)半日跌3.4%，國壽(02628)亦錄2.1%跌幅。

除咗生科股跌勢顯著，今日科網科技股表現亦未如人意，舜宇(02382)半日跌6.6%，藍籌之中跑第尾，ATMJ全線向下，跌幅由2.7%至5.8%不等。百度(09888)跟網易(09999)分別跌3%及1.9%，多隻科技股已拖低恒指超過250點，佔大市一半跌幅。

上周阿Man已多次強調，大市超買後要回調，加上北水春節假後回歸，未有再掃貨，反而沽貨套現，而美元由低位反彈，都為港股平添沽壓。恒指失守10日及20日線後，睇嚟短期回補20800至21000嘅上升裂口機會大增，甚至有機會下試50及250日線水平，約20100-20200點，順便完成大型頭肩底嘅右肩部份。不過內地防疫後開關，未來將會着眼於提振經濟，目前可以趁大市回調分段吸納優質股份，ATMJ、百度跟網易；仲有信達或康方(09926)等，都會係阿Man嘅心水。

麥狄文
(徐狄怡‧證監會持牌人)