即巿股評 | 2023-02-02 14:31

【盤房來料】港股十天線爭持 上升動力大減

隔晚美股先低後高，FOMC議息一如預期加0.25厘，加息步伐正如市場預期般放緩，雖然鮑爺已表示今年之內唔會減息，但目前FOMC正討論再加幾次息，令利率升至限制性水平，就會暫停加息，市場解讀為鮑爺放鷹。

鮑爺亦提到商品和住屋的價格上升壓力似乎正在紓緩，但同時警告服務業通脹依然強勁，目前話已擊退通脹實言之尚早。即使尚未擊退通脹，鮑爺亦堅持未可以暫停加息，但佢對美國經濟前景睇法傾向樂觀，認為目前美國經濟仍然可承受較為緊縮嘅貨幣政策，經濟有望軟着陸，就業市場亦未見惡化。由於FOMC預期美國經濟唔係太差，今年內亦毋須要透過減息刺激經濟，既然經濟前景理想，美股當然要贈興，三大指數低位回升，標指更升越4100阻力。

至於港股，隔晚喺ADR已升逾百點，恒指高開204點，最多升239點，見22311半日高位，不過A股倒跌，拖累港股升勢不保，曾倒跌11點，見22060半日低位，但暫時10天線(22035)有不俗支持，大市止跌回升。半日恒指收報22162，升90點；國指則升36點，報7596；恒科指升81點，收4777。半日成交額只有765.51億元，資金買貨唔算積極。

藍籌股普遍上升，騰訊(00700)一度高見392元，半日升1.5%，400元阻力唔係咁容易突破。阿里(09988)半日升0.5%，京東(09618)升1%，但美團(03690)則跌0.2%，暫時喺180水平爭持。AI概念繼續熱炒，百度(09888)半日再升6.9%，成為最大升幅藍籌股。金融股今日亦見反彈，大笨象(00005)半日升1.3%，建行(00939)跟工行(01398)則升不足1%。

比亞迪(01211)近日升勢銳不可擋，上月銷售升近六成，半日股價再升1%，盤中曾創268元月內新高。之前阿Man都不停強調，內房股嘅債務問題一日未解決，即使從低位反彈唔少，但嚟到現水平，就只係有波幅、冇升幅，內房跟物管股唇齒相依，碧服(06098)半日跌逾4%，成為最大跌幅藍籌股。

生科股今日表現唔錯，主要係加息步伐放緩，對呢類需要融資開發，而又未賺錢嘅高增長企業係利好嘅，整個板塊嘅股份都有理想表現，當中最強勁係永泰生物(06978)，半日升近兩成。而康寧傑瑞(09966)、騰盛(02137)、沛嘉(09996)、諾輝健康(06606)及加科思(01167)升幅接近或超過一成。其他生科股，閒閒地都錄得2%或以上升幅。手遊股係另一個今日熱炒板塊，當中雲遊(00484)爆升近一倍，不過呢啲股仔隨時炒一日無影，都係睇人表現咪多手。其他手遊股升幅由半成至兩成半不等。

濠賭股逆市向下，媒體《allinmedia》引述博彩業界消息報道，澳門政府近日通知博彩中介須就轉碼數的佣金繳交5%的稅項，整個板塊腳軟，跌幅由1.1%至近3%不等。濠賭股雖然受惠澳門復常，但賭場收入點都難復當年勇，尤其係疊馬仔嘅貴賓廳收入大減，未來賭收方面，唔會再回復過往高增長嘅風光日子，呢個板塊可能都係炒吓波幅，好難長線坐定定持貨。

麥狄文
(徐狄怡‧證監會持牌人)