港股直擊 | 2023-01-20 13:32

【盤房來料】虎去兔來過年再候港股更佳切入點

隔晚美股偏軟，美國政府支出觸及債務上限，而聯儲局官員又持續放鷹，市場憂慮息率高企或拖累經濟，三大指數全線向下，道指跌252點；標指跌29點；納指亦跌104點。不過反映中概股表現嘅金龍指數逆市上升，帶動隔晚夜期跟ADR走高，並升至21800水平，今早港股順理成章裂口高開。

恒指高開161點，一度升252點，見半日高位21903，逼近周一高位21947，其後升幅收窄至103點，見半日低位21754。半日恒指報收21868，升217點；國指升107點，報收7120；恒科技升70點，報收4520。半日成交額只有432.19億元，但長假期前夕，都預咗成交縮水。至於內地股市喺虎年最後一個交易日做好，保持升勢。

藍籌股都係個別發展，但指數權重科網股做好，令大市高企，騰訊(00700)高開390元，升至十個月高位，半日升勢略為回順，但仍接近高位，半日升1.5%，報收388.6元。今日唔單止騰訊精神，ATMJ全線向上，阿里(09988)半日升2.6%，報收115.2元，短線阻力120元，睇下過年返嚟有冇本事挑戰；至於美團(03690)噚日守咗160元支持位後，今日反彈近4%，半日報收166.6元，結束十連跌；京東(09618)亦反彈1.8%，半日報收236元，留意短線阻力240元。油價回升，今早三桶油做好，而中海油(00883)發盈喜，去年全年賺多一倍，股價半日升4.8%，成為表現最好藍籌股。中石油(00857)亦表示去年淨利潤增長超過五成，股價半日同樣升逾4%；中石化(00386)半日則錄得2.4%升幅。

除咗石油股，中資電訊股今日表現亦突出，中電信(00728) 公布控股股東中國電信集團去年1月計劃在12個月內擇機增持公司A股，擬增持金額不少於5億元人民幣。股東增持消息刺激下，半日升3.1%，更曾高見3.61元，創52周高。聯通(00762)亦見資金流入，公司日前公布，因會計估計變更而影響去年盈利約17.6億元人民幣，但初步測算，考慮本次會計估計變更影響後，去年盈利同比增速仍實現近3年新高；股價半日升3.3%，表現仲勁過發盈喜嘅中電信。至於阿Man認為係收息股理想之選嘅中移動(00941)，半日亦升1.2%。

其他藍籌股表現不一，但逆市下跌股份沽壓又唔算嚴重，只有東方海外(00316)半日跌逾4%，成為表現最差藍籌股，其他下跌藍籌股，跌幅普遍低於1%。東方海外被大行下調評級至跑輸大市，其實阿Man都唔係太意外，其實航運股早於去年中已見頂，阿Man亦講過好多次，呢個板塊嘅高潮已過，走出上升周期後，股價將有一段時間有波幅，冇升幅。

嚟到虎年最後一個交易日，而1月交易日亦只剩下四日，睇返1月份港股表現，係高開高走，嚟到呢個星期，變為高位震盪，暫時未見較大幅度回調，未有貨喺手嘅，都係過埋年甚至期指結算後再作打算，暫時宜耐心靜候機會。反正過年長假幾日，唔想心掛掛可以佳節盡興，今日提早收爐，好好準備團年。虎去兔來，期望虎年過去，可完全擺脫疫情之苦，迎來活潑兔仔，望兔年港股如兔仔般脫跳，祝大家股匯齊贏，兔年大賺。本專欄是日歲晚收爐，初九啟市，初五初六暫停兩日，初九同大家再戰缸湖。

麥狄文
(徐狄怡‧證監會持牌人)