即巿股評 | 2023-01-16 13:07

【盤房來料】大市高位震盪 惜成交未能配合升勢

上周五美股保持升勢，三大指數先跌後升，納指更連升六個交易日，重上11000大關，標指亦逼近4000關口。當晚夜期跟ADR都跟隨美股再升，今朝亦高開，A股做好下，港股再創超過六個月高位。恒指高開79點後，一度升逾百點，其後升幅收窄，更一度倒跌5點，見21732半日低位後再回升，半日最多升208點，見21947半日高位。中午恒指報收21896，升158點；國指升24點，報收7415；恒科指半日升6點，報收4560，恒科指跑輸。半日大市成交額750億，大市自升上21000水平後，成交額一直未見顯著增加配合升勢，雖然大市仍未似要作較大幅度調整，但喺21000水平之上，已一點拉牛上樹，上升乏力嘅感覺。

美國通脹放緩，FOMC已無需要再加大力度調高利率，美滙指數見頂後轉弱，人民幣持續回升，今早離岸價對兌元升破6.7，創超過半年新高。資金近日再次回流至人民幣資產，外資積極買入A股，加上內地調整防疫政策，中國從新開放，國際資金對中國重新回歸全球供應鍊，再次發揮世界工廠作用嘅期待，有利A股收復估值。而港股方面，由於大部份上市公司為內地企業，國際資金回流人民幣資產，港股亦間接受惠。

藍籌股今日繼續個別發展，以金融股表現較佳，撐起大市。大笨象(00005)半日升1.6%，終企穩55元水平，友邦(01299)先跌後回升，半日升0.4%，重返88元水平之上。內地金融股表現更強，招行(03968)預告去年多賺15%，股價半日升2.5%，其他內銀股跟內險股普遍向上。至於重磅科技股表現則好壞參半，阿里(09988)半日再升近1%，騰訊(00700)跟小米(01810)半日升0.8%。美團(03690)維持弱勢，半日再跌2.7%；京東(09618)半日跌近0.9%；網易(09999)半日跌1.3%。

地產股今日回升，新世界(00017)跟恒地(00012)半日升逾3%；三桶油亦續升，中海油(00883)半日升2.7%表現最好。而醫藥股跟生科股今日有資金追捧，藥明生物(02269)半日升6.2%，藍籌之中跑第一；同系藥明康(02359)跟藥明巨諾(02126)半日更分跌升一成及兩成。其他唔少生科股，半日升一成以上。

雖然內地已復常從新開放，但內地餐飲股今日表現不濟，主要係A股全聚德指堂食恢復不及預期，拖累港股嘅餐飲股受壓，海底撈(06862)半日跌2.2%；同系頤海(01579)亦跌4.2%；呷哺呷哺(00520)跌6.6%，表現最差；九毛九(09922)則跌1.4%。

今日有三隻新股齊齊掛牌，內地美容服務提供商美麗田園醫療健康(02373)半日收30.35元，比招股價19.32元，高出五成有突。而內地最大水果零售經營商百果園集團(02411)半日報6.26元，較招股價5.6元升11.8%。不過內地手機遊戲開發商望塵科技(02458)半日報5.59元，較招股價6.5元低14%。新股呢期多咗人關注，但又唔係全部上市都有理想表現，要參與新股炒作，就只有順勢而行，入場炒作唔係問題，一見有唔對路，最緊要識得落車。

大市暫時仍然高位震盪，雖然恒指暫受制22000水平，而成交亦唔見得配合升勢，但正因為成交疏落，指數更易舞高弄低，仲有幾日放農曆年長假，而下周假後，又係期指轉倉高峰期，呢段時間再買貨嘅值博率已唔高，阿Man寧願忍忍手，留待假期後再作定奪。

麥狄文
(徐狄怡‧證監會持牌人)