港股直擊 | 2022-12-06 14:26

【盤房來料】後市樂觀審慎 萬九樓上唔追貨

雖然鮑爺轉咗口風放鴿，但《華爾街日報》指聯儲局可能調高利率預測，美股隔晚三大指數下跌，港股隔晚喺夜期跟ADR都見回吐，話晒噚日升咗八百幾點，現貨RSI又上到70+，回吐都正常，只係今早開市表現反覆，早段曾經倒升。

恒指低開306點，其後跌幅擴大至315點，見19202，不過19200似乎有啲支持，止跌回升最多升51點，見19569半日高位，只不過呢個位係由年初25000水平延伸落嚟嘅下降軌頂部，邊有話咁容易突破，卒之升勢不保，中午跌近200點收市，恒指半日收報19336，跌181點；國指報6614，跌91點；恒科指跌81點，報4156。半日成交額較噚日有所回落，不足千億只有934.84億元，嚟到萬九水平，即使對後市仍樂觀，買貨都會較為審慎。

藍籌股整體偏軟，經過早兩日急升後，回吐亦屬正常，ATMJ之中，京東(09618)跟阿里(09988)齊齊跌3%，美團(03690)跟騰訊(00700)半日分別跌0.9%及1.1%，其他科網股普遍回落超過2%，唯獨快手(01024)半日仍保持不足2%升幅。金融股今日普遍向下，友邦(01299)跟大笨象(00005)半日分別跌0.1%及0.2%，算跌得少，內地金融股沽壓較大，平保(02318)跟國壽(02628)分別跌5%及近3%，招行(03968)則跌4.4%。

內房跟物管股表現反覆，雖然阿爺已有明確指示要幫助內房渡過難關，但阿Man已一再強調，內房真係要擺脫困局，始終係要樓市回暖，銷售復活，否則內房問題，只係治標唔治本。今日龍湖(00960)旗下嘅「21龍湖06」跌停，龍湖半日跌半成；但又唔係整個板塊齊插水，旭輝(00884)跟禹洲(01628)半日逆市升，其他內房物管股普遍回軟。

美國市場又重燃息口向上嘅恐懼，對於息口走勢較敏感嘅生科股構成壓力，香港上市生物科技指數半日跌2.7%。而呢個時候三葉草生物(02197)以較上日收市價折讓13%配股，股價半日跌8.6%，其他生科股跌不足1%至超過8%不等。

港股升抵萬九水平後，短線呈超買，暫時要整固一下亦合理，短線支持係19200左右，不過19500至19600下降軌未能突破，呢一下回調有機會深少少去返19000樓下，阿Man又要引用返上個月成日講嗰句，不過今次就有少少改動，由50天線變成100天線，只要守住100天線，大約係18360，18400水平守得住唔死，港股唔死得，仍有條件喺年結及月結時，再度挑戰下降軌頂部19500至19600，甚至20000水平。

麥狄文
(徐狄怡‧證監會持牌人)