« 返回前頁列印

即巿股評 | 2022-10-07 17:54

【環宇搜股】標指熊彈失3650要閃

放大圖片

踏入第四季一如預期全球股市應聲急彈,雖然美股隔晚急跌,但美股三大指數開局暫時都升逾4%。

今晚大家焦點在晚上八時半公布美國非農、失業率及平均時薪等數據,將影響未來聯儲局加息決定,現時市場估11月2日聯儲局加息四分三厘機會達76%,12月14日再加0.5厘機率為68.3%,屆時年底息口會攀至4.5厘,在此加息路徑之下,對股市當然不利。

不過,從隔美股盤路睇,短期偏向反覆向上概率較大,儘管隔晚道指插346點,標指與納指也分別跌1%和0.7%,但以標指來計,昨晚急挫成交未有放大,也比周一及周二急彈時成交量細,目前似在十天線(現處3693)上整固階段。

現時標指上面受制20天線(現處3803),下面有十天線支持,若果向上升穿廿天線,筆者就立即拍手叫好,因標指會再往上衝至目標3900點。

萬一不幸今晚失守十天線,更質穿3650關,意味整個好倉盤便要反轉做淡,皆因可能會再出現新一浪急跌,此情況筆者認為出現機率約40%。當然最理想情況是望大市挾上3900後平好倉,之後建立淡倉。

英鎊兩頭唔到岸

從大棋盤角度真喺一步一驚心,上周英倫銀行焗出手將QT變QE,央行副行長康利夫(Jon Cunliffe)昨晚直認多個採用「負債驅動投資」(Liability Driven Investment,LDI)策略投資基金,資產淨值一度瀕臨跌至負數,面臨被清盤的險境,即喺唔出手都唔得!

而家最麻煩是大家都知英國唔買債掃冧債息都唔得,命運就喺好似日本一樣,要壓死十年債息唔準超過0.25厘,副作用就喺日圓只會越來越弱。

英國仲有更多麻煩嘢,例如埋蘇格蘭和北愛爾蘭「脫英」呼聲再起,新任國王查爾斯三世及王后卡米拉急急腳訪問蘇格蘭,萬一蘇格蘭和北愛離英,對英鎊前途會有一個好大問號。

再加上,俄烏戰爭前,英國有俄羅斯資金力撐住,但俄烏戰爭爆發,俄羅斯富豪在英國家財四散,連大家最熟識嘅前車路士班主阿巴莫域治,都平價沽咗車路士股權,家埋脫歐後無咗平價勞工,萬一英國經濟出事,全世界都中伏,始終全球三大金融市場紐倫港,倫敦都佔一席位。

總括來講,無論日本、英國、歐洲以及亞洲地雷處處,加埋聯儲局仍大幅加息,美股走勢似足08海嘯(圖一),緊記牛市仍未重臨,熊彈落車要狠。

編按:作者尹德政(Ricky),醉心投資美股近十載,最大滿足感來自尋找抵買有實力的世界行業領袖,每逢周三、五在「信報網站」及「港股360」撰文。

[email protected]

美股標普五百指數與08海嘯對比