即巿股評 | 2022-10-07 13:32

【盤房來料】港股回復陰乾尋底狀態

美股三大指數隔晚繼續低走，市場等待今晚非農數據。不過周三小非農反映美國就業市場仍然強勁，薪金高居不下，即係就業市場目前嘅情況，美聯儲局大有條件繼續加息。美國睇怕都無乜可能放慢加息步伐，始終依家大前題係壓返低個通脹，美滙指數回升，港股今日又復跌。

恒指低開160點，跌幅一度擴大至226點，見17786半日低位，不過10日線(17633)似乎未有耐到，仲守得住，其後跌幅曾收窄至130點，見17881半日高位。只可惜周末前夕缺乏資金入市，半日成交額只有331.3億元，半日恒指報收17809，接近半日低位，跌202點；國指則報收6089，跌96點；恒科指跌102點，報收3558。

藍籌股普遍偏軟，重磅藍籌股只有友邦(01299)避過一跌，半日逆市升1.8%，仍企穩喺70元樓上；大笨象(00005)半日跌1.5%，重返42樓下。科技股大部份下跌，恒科指半日跌2.8%跑輸大市，ATMJ全線向下，當中以京東(09618)半日跌3.3%跌得較多，半日再度失守200心理關口；騰訊(00700)半日跌2.4%，280元呢個前支持位變成反彈阻力，早兩日反彈都上唔返去，睇嚟又會再次向260元推進。其他藍籌股乏善陳，係濠賭股叫做有啲憧憬，前日裂口高開後，銀娛(00027)跟金沙中國(01928)仍可以企穩高位續升。

汽車股今日表現奇差，雖然中國汽車工業協會(中汽協)推算，上月汽車銷量月增5.7%，但汽車股整體下挫。比亞迪(01211)今日重返200元之下，半日跌1.1%，收194.4元。蔚小理三隻中概汽車股，隔晚喺美股已跌到一仆一碌，今日三股再顯著下跌，小鵬(09868)半日再跌6.8%，蔚來(09866)半日跌8.9%，理想(02015)表現最唔理想，半日大跌逾16%；而上市無幾耐嘅零跑(09863)甫上市已潛水，早段低見23.1，不過其後拗腰回升，半日升返4.9%。傳統汽車股一樣無運行，長城(02333)半日再跌5.2%，吉利(00175)跟廣汽(02238)分別跌3.9%及4%。至於停牌超過一年後復牌嘅華晨(01114)跌勢未止，半日再跌逾半成，現價相對停牌前喺7元水平，足足唔見咗七成。

除咗汽車股之外，內房跟物管股今日亦捱沽，旭輝(00884)傳延付離岸貸款到期息，近日已遭評級機構一再調低其信貸評級，股價半日再插15.3%，同系旭輝永升(01995)亦跌逾一成。旭輝咁搞拖累整個內房物管板塊插水，閒閒地跌幅超過2%，碧桂園(02007)半日跌11.1%，藍籌之中包尾，龍湖(00960)半日跌8.3%，緊隨其後跑尾二。內房產業一片慘淡，水泥股同內房產業息息相關，華潤水泥(01313)發盈警，預期首九個月盈利顯著減少，股價半日跌7.1%，其他水泥股陪跌，跌幅超過3至5%。

港股經過周三大反彈後，當日成交雖然重上一千億，但都唔算得上配合逾千點升幅，噚日成交額已縮水去返625億，根本就無資金流入，缺乏成交支持，反彈又邊有法子延續落去。恒指仲要重返萬八關之下，港股又係死貓彈完無嘢睇，回帶去返之前日日陰乾尋底嘅狀態。

麥狄文
(徐狄怡‧證監會持牌人)