港股直擊 | 2022-10-03 14:01

【盤房來料】港股假期前夕表現更慘淡

美國通脹高居不下，市場憂慮聯儲局繼續大幅加息，而Nike亦公布第三季度庫存大增逾四成，反映美企喺高通脹下，銷售影響浮現，美企經營環境轉差，經濟衰退風險上升。唔少人問美股去到幾時先見底，聯儲局會唔會出手救市，提一提醒大家，疫情前嘅標指大約係3400水平，咁家下標指都企喺3500樓上，即係聯儲局似乎無乜理由要出手救市；至於幾時見底，就要留意美股有冇恐慌性拋售，而通常VIX去到35樓上，恐慌拋售先會出現。換句話講，美股雖然近日拾級而下，但仍未到見底嗰下，大家仲要捱落去。

港股繼續無運行，由於今早道指期貨跌逾百點，拖累恒指低開172點，雖然跌幅一度收窄至更曾倒升29點，但其後跌勢再現，更一度曾守17000大關，跌237點見16985半日低位，再創11年新低。中午恒指報收17018，跌204點；國指跌68點，報收5845；恒科指曾倒升1.4%，中午跌近1%或31點，報收3418。明日重陽節假期，加上北水休假，半日成交只有340.77億元，少得可憐。

藍籌股之中三分二下跌，龍頭騰訊(00700)再創52周新低，見260元，半日跌2.3%，報收260.4元接近低位。美團(03690)跟京東(09618)再跌逾2%，阿里(09988)則跌0.7%，80元睇怕由支持變成短線阻力。喺成交日復日縮水，近日嘅IPO又頻頻潛水，乏人問津下，港交所(00388)亦創52周新低，半日低2%。不過藥明生物(02269)跟創科(00669)半日分別升1.5%及2.7%，係三分一唔使插水嘅藍籌。

除咗藥明同創科，內房股跟物管股今日逆市向上，碧桂園(02007)跟碧服(06098)半日分別升6%及8.5%，後者更成為表現最好藍籌股。內房股得以反彈，全靠人仔喘定，加上人行決定10月1日起，下調首套個人住房公積金貸款利率0.15個百分點。內房跟物管股今日逆市反彈。不過中資金融股今日跌勢較顯著，無論內銀、內險，抑或中資券商股全部下跌，而上周四被李嘉誠基金減持五萬股嘅郵儲行(01658)，股價更半日跌近一成。

港股繼續尋底，外圍股市不濟，人民幣表現低迷，再加上人地十一假期，北水都休息，本來已缺水嘅港股，更加無人問津，明日假期難令缸邊友入場掃貨，尤其係大市跌至已水平都無人肯入場，可見氣氛真係沒有最差，只有更差。

麥狄文
(徐狄怡‧證監會持牌人)