國際財經 | 2022-09-30 18:03

【環宇搜股】把握最後逃生機會

今日喺9月30日，即第三季最後一日，港股本季跌得好傷，恒指插21.2%，科指更大跌近三成，美股三大指數亦唔見一截，執筆時(9月30日下午)已則挫5%、3.8%和2.6%。

在周一美股節目曾預計股市將會出現季度結挾升，呢刻亦未出現，但筆者仍相信短期反彈機會大，原因是美股跌得過急，以近百年標普50天線差距睇，目前標普500指數低過50天線9.5%(圖一)，即比起兩個標準差9%更低，所以好大機會觸發反彈。

不過，要重申一點，若果出現反彈，絶對是熊市反彈，正如之前不斷重複又重複講，美國聯儲局依然大力加息，年底息口會攀上4.5厘，明年2月市場再料會加到四分一厘至4.75厘，最終會觸發新一輪跌浪。

目前市況已與08年走勢甚相似，今日連前財長薩默斯也認同，佢形容現時金融市場問題好似地震前震顫，所以大家必須要好好管理風險。

最後反彈最多個半月

如果研究番2008年美股海嘯情況，目前大有機會出現反彈(圖二)，由低位計反彈幅度約9%左右，時間約一個半月，之後最凶險情況金融海嘯便價出現，尤其是現時走勢已極相似，加上目前標指低過50天線9.5%，與08年差別不大。

如果美股反彈跟足08海嘯一樣反彈個半月，便會啱啱過左11月8日中期選舉，即喺無再必要頂住個市，大家隊個市落去絶對唔感意外。

美股熊底仍有逾三成跌幅

尤其是目前標普五百指數預期市賬率達3.4倍，相當於正一標準差，估值偏貴，一旦回落至2.3至2.5倍水平，標指下插至2400至2500點水平，也是約十倍預期市盈率，即比上日收市3640，要插31至34%，表面看似好多，其實又唔喺，因為疫情大放水前，起步位在2191點。

至於港股，萬一美股大冧，港股當然都會被掟，跌幅可同美股差唔多，全球股市十月反彈將是最後逃生機會，要好好把握。

編按:作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周三、五在「信報網站」及「港股360」撰文。