即巿股評 | 2022-09-29 14:55

【盤房來料】港交所估值仍然偏高

隔晚美股回升，主要係受到英倫銀行忽然宣布緊急買債方案，呢頭話收水，嗰頭見英鎊因為公布咗個減稅方案又話要買債，夠晒精神分裂，睇嚟英國都唔知自己想點，咁搞法英鎊都唔會有好日子過。不過呢個消息又確係令本來高企近4%嘅美國10年債息回落至3.75%水平，令美股得到喘息機會，加上超賣嚴重，乘機彈一彈。道指跟標指升逾1%，納指跑贏彈逾2%，港股隔晚喺ADR跟夜期時段，亦緊貼歐美反彈步伐，重上17600水平。

恒指高開319點，最多升378點，見半日高位17629，可惜成交薄弱得可憐，仲要北水開始放假，大市升幅乏成交配合下收窄至150點，見17401半日低位。不過17400好似有啲支持，半日恒指升216點，報17466；國指收復6000關，升68點，報6027；恒科指升22點，收3548。喺北水缺席下，半日成交額縮水至413.8億元，買賣兩閒。

藍籌股大部份回升，不過友邦(01299)唔識彈，畀大行降目標價，半日再跌0.2%。至於碧桂園(02007)跟碧服(06098)同樣逆市下跌，半日分別跌6.9%及2.7%，碧桂園更成為半日表現最差藍籌股。其他藍籌股反彈力度一般，ATMJ以阿里(09988)半日升4.4%最勁，亦係半日表現最好藍籌股；美團(03690)跟京東(09618)半日升逾2%，騰訊(00700)半日升唔夠1%，四隻之中又包尾。

英鎊喺英倫銀行公布緊急買債後反彈，重英國資產股止跌回彈，不過相對早前跌幅，今日嘅反彈微不足道。滙控(00005)升2.5%，渣打(02888)漲2.1%，保誠(02378)升1.5%，長實系升0.4%至2.6%不等。長實(01113)出售波老道豪宅貨尾，留意誠哥一出手，便知有沒有，長實連咁優質嘅高貴地段豪宅貨尾都拎出嚟賣，阿Man唔敢想像本地樓市仲要落幾多。

除咗英鎊反彈之外，金價亦見反彈，並錄得兩個月以嚟最大單日升幅，金礦股回升，以龍頭紫金(02899)半日升逾半成最本事，其他金礦股半日升1.2%至3.9%不等。雖然人民幣暫時止跌，但內房物管股喺美匯指數高企下，繼續無運行。大行踩多腳，調低旭輝(00884)目標價，股價噚日急插兩成後，今日又一度再挫兩成，半日跌16%，兩日慘變毫子股。同系旭輝永升(01995)亦被削評級，目標價被狠劈一半至2.5元，股價半日跌4.7%。其他內房股及物管股無一倖免。

零跑汽車(09863)招股時未能足額認購，硬著頭皮照上市，今日首掛一開即潛水14%，股價一度插水四成，半日報收30.3元，較招股價跌36.8%。其實踏入2022年以嚟，新股掛牌幾乎隻隻潛水，只係浮潛定深潛，過往港交所(00388)靠IPO食糊，今時唔同往日，無論IPO又好，日常成交都好，縮得就縮，港交所目前預測市盈率仍有30倍，偏貴，係少數仍未夠吸引力，嫌唔抵買嘅重磅股。

麥狄文
(徐狄怡‧證監會持牌人)