即巿股評 | 2022-09-27 14:54

【盤房來料】陰乾式跌市更具殺傷力

隔晚美股續跌，美滙指數持續高位整固，對股市固然不利。而內地首8個月工業利潤跌2.1%，港股四個交易日跌近千點後，今日仍未識得反彈，早段曾跌逾200點，再跌至近11年新低。恒指低開16點，早段一度升49點，見17904半日高位，可惜內地數據公布後，跌勢重現，半日最多跌206點，見17648半日低位，兼創近11年新低。中午恒指收報17665，跌189點；國指跌80點，報6057；恒科指中午收3585，跌62點。噚日全日成交重上千億元，以為終於低位有人肯買吓貨，誰知今日跌勢未止，半日成交額又縮返水得443.63億元。

息率高企，加息周期持續，過往靠高增長支持高估值嘅科網股，呢啲情況變得一文不值，沽壓自然大過其他板塊，四大天王，ATMJ除咗美團(03690)無起跌之外，騰訊(00700)跟阿里(09988)半日分別跌2.7%及2.9%，京東(09618)失守210元，半日跌1.3%。其他科網股普遍下跌，跌幅由1%至3%不等。

其他藍籌股都係瓜多過菜，受英鎊下挫拖累，大笨象(00005)噚日急跌7%後，今日仲未識彈。汽車股今日再度走軟，比亞迪(01211)210元水平爭持，半日跌1.7%，吉利(00175)跌2.5%，其他汽車股都係咁上下。市場擔心本港實施「0+3」入境安排後，唔單止吸引唔到外國遊客到訪，反而便利咗本地居民外遊，領展(00823)跟地鐵(00066)半日齊齊跌逾3%，可能同呢個原因有關。

金價近日連番下挫，隔晚期金再跌逾1%，金礦股全線下挫，紫金(02899)半日跌1.4%，其他金礦股跌幅由近1%至過2%不等。何止金礦股跌咗唔少，資源格價亦隨金價下滑，其他資源股一樣無好日子過。

上周阿Man都講咗，港股弱勢難扭轉，加上缺乏資金流入，可能呈陰乾格局，果然港股先後跌穿19000及18000兩關後，仍然唔識反彈，日復日下跌，進入陰乾模式，唔好問阿Man個市幾時同埋喺邊個位見底，陰乾式嘅跌市，比起一次性急挫一兩成嘅股災式快速下跌，其實係更具殺傷力，遲遲未能見底，只會更消磨缸邊友嘅意志及購買力。

麥狄文
(徐狄怡‧證監會持牌人)