即巿股評 | 2022-09-05 13:19

【盤房來料】港股下試萬九心理關口支持

上周五美國公布就業數據，雖然好過預期，早段美股曾反彈，可惜後勁不繼，至中午走勢逆轉，收市三大指數下跌，三大指數跌逾1%收市。美股連跌三星期亦未見反彈，雖然已進入超賣區，但反彈乏力，今晚美股假期，且看美股假期後能否有本事彈一下。不過利淡消息充斥市場，美國政府決定延長對中國進口商品繼續徵收懲罰性關稅，同時將啟動審查程序，檢討關稅必要性。另外，拜登據悉考慮採取行動限制美國對中國科技企業投資。另一方面，內地疫情反覆，內地至少33個城市處於部分或全域靜態管理，內地堅持清零政策，封城管理下，經濟活動受限，股市又點會好。

恒指今早曾跌近400點，逼近19000心理關口，恒指跌開153點後跌幅擴大，最多跌387點，見19064半日低位，同時跌穿5月10日低位19178，創五個半月新低。其後跌幅收窄，半日恒指報收19203，跌203點；國指半日跌98點，報收6574；恒科指半日跌83點，報收4060。半日成交額598.74億元，暫時喺低位未見有大量資金流入博撈底，似乎港股仍有機會向下探底，望就望19000水平呢個心理關口頂得住。

藍籌股新嘅季度檢討今日正式生效，恒指成份股數目增至73隻，半日只有17隻藍籌股上升。港交所(00388)半日創52周低，半日跌2.5%，短線支持位喺300大關，睇下守唔守得到。股神繼續減持比亞(01211)股份，股價半日跌逾4%，再創近四個月低位。重磅藍籌股只有友邦(01299)逆市靠穩升0.8%，不過股價一日未上返75水平之上，都仲係危危乎。不過三桶油逆市做好，以中石油(00857)半日升2.5%表現最佳。

科技股全線走軟，ATMJ幾隻龍頭全部受壓，騰訊(00700)跟美團(03690)分別跌3.1%及2%，京東(09618)半日跌3.3%，阿里(09988)亦跌2.3%。其他科技股普遍下跌，不過商湯(00020)被納入國指成份股，半日竟逆市升2.8%。

生科股今日沽壓亦明顯，生物科技指數一度跌逾3%，剛染藍嘅翰森製藥(03692)半日跌3.4%，唔通又擺脫唔到一染藍，股價殘嘅厄運?? 藥明系全線向下，其中藥明巨諾(02126)半日跌近兩成，而跌逾一成嘅生科股仲有復星醫藥(02196)。康希諾(06185) 吸入用重組新冠疫苗作為加強針獲納緊急使用，股價半日逆市升近一成，係唯有逆市走強嘅生科股。

港股跌咗幾日，暫時半日落到19000水平附近，若然維持上落市格局，嚟到呢個位都差不多要彈一彈，只不過利淡消息充斥，暫時未見有乜利好消息可以帶動大市回升，能守住19000支持，都要劏雞還神。

麥狄文
(徐狄怡‧證監會持牌人)