即巿股評 | 2022-07-29 14:22

【盤房來料】港股能守二萬大關已謝天謝地

美國公布GDP連續兩季陷入收縮，技術上陷入經濟衰退，其實係極度利淡，但反而市場樂觀情緒蓋過一切，市場反而集中焦點去咗聯儲局會放慢加息腳步，甚至揣測幾時減返轟頭，美股三大指數升跌後回升，但港股卻半步亦跟唔上，略略低開已低走，幾乎落到半日低位收市。

恒指高開24點，見20647，經已係半日高位，10日線(20649點)未能修復，甚至成為阻力，大市隨即掉頭向下，更跌穿月中低位，半日最多跌496點，見20126半日低位。半日恒指報收20148，跌473點；國指跌200點，報收6882；恒科指跌193點，報收4358。半日成交額633.59億元，相對呢幾日半日唔夠500億嘅成交額，跌市成交放大，當然唔係好事。

藍籌股普遍受壓，跌得最明顯係科網股，整個板塊全軍覆沒，杭州市場監管局約談美團(03690)及阿里巴巴(09988)旗下餓了麼，再度挑起市場對監管嘅憂慮；美團半日停5.2%，跌穿近日180支持位，阿里失咗紅底股身份，股價再插逾半成。騰訊(00700)一直被主要股東隨時減持嘅陰霾籠罩住，股價一沉不起，半日再跌3.4%；京東(09618)無事無幹，半日亦跌4.2%，短線支持240呢一關失守，下一個支持位220不容有失。其他科網股閒閒地跌3%以上，京東健康(06618)更跌近一成，成為表現最差恒科指成份股。其他藍籌股幅普遍超過1%。除咗科網股表現較弱，生科股今日亦見沽壓，藥明康德(02359)叫做有份幾好樣業績支持，半日都要跌1%，同系藥明生物(02269)半日跌4%.4%。其他生物股跌半成嘅比比皆是。光伏股係今日竟然跑出，整個板塊見資金流入，信義光能(00968)半日升5.8%，成為表現最好藍籌股。其他光伏股升幅由1.5%至超過6%不等。

對住港股咁嘅市況嘅港股，阿Man都無話可說，反彈就無成交，跌落嚟成交就增加，弱勢到一個點，港股一日未能解決資金短缺嘅問題，而喺目前宏觀經濟環境下，港股好難有運行，能夠守住20000點心理關口，已經謝天謝地。

麥狄文
(徐狄怡‧證監會持牌人)