即巿股評 | 2022-07-06 13:59

【盤房來料】港股表現反覆 目前仍處上落市格局

美股隔晚表現反覆，美債出現孳息曲線倒掛，美滙則企在20年高位， 10年債息回落並唔係聯儲局立場由鷹轉鴿，係市場開始擔心經濟衰退多過通脹高企。道指盤中曾跌逾700點，收市跌幅收窄至不足200點，標指跟納指倒升，美股單日波幅愈嚟愈大，風高浪急之下，正不斷淘汰欠實力嘅投資者。又或者係市場都唔願意投資，逐漸轉向投機，令美股出現快上快落嘅現象。

至於港股亦係忽上忽落，噚日低位拗腰跟隨A股扭轉跌勢後，今日又復走軟，恒指盤中更曾跌逾300點，失守多條移動平均線。恒指低開75點後，跌幅一度收窄至19點，見21833半日高位，但資金唔買貨不特止，二萬二關前選擇走人居多，拖累跌幅再度擴大，最多跌372點，見21480半日低位。中午恒指收報21554，跌298點；國企指數收7527，跌115點；恒科指跌逾1%，報4806點。

藍籌股整體偏軟，ATMJ全線向下，京東(09618)跌4%，但仍未回落至240元水平，暫未到值博可以買入嘅區間。其他幾件科技巨頭，跌幅均少於1%。其他藍籌股普遍偏軟，中海油(00883)跟中石油(00857)半日分別跌5.6%及4.9%，藍籌之中表現較差。市場憂慮經濟衰退，加上美匯指數高企，商品價格走軟，油價更急跌逾半成，期銅亦跌逾4%。商品股及資源股全線向下，跌幅閒閒地超過4%。

美債出現孳息曲線倒掛，銀行股受壓，尤其係港銀股，大笨象(00005)半日跌近4%，其他銀行股閒閒地跌2%或以上。噚日無啦啦急升嘅大新金融(00440)，離奇上升之謎底解開，原來其中一名主要股東日本銀行三菱日聯金融集團(MUFG)正研究出售持股，噚日出咗咁大枝長針已知不妙，今日跌3.6%，幾乎抹去噚日升幅，即管睇睇主要股東會用個乜嘢價減持。

電力股逆市造好，煤價急跌令產電成本下降，對傳統電力股當然係好事，板塊內股份普遍向上，而阿Man一向鍾情嘅綠電股龍頭龍源電力(00916)，今早亦曾逼近100天線阻力15.8元左右，順利升抵短炒目標價，阿Man亦選擇食糊先，反正目前都係上落市格局，有糊唔食，罪大惡極，等回調再吼位上車，暫時龍源都係區間上落，炒住range先無壞。

麥狄文
(徐狄怡‧證監會持牌人)