港股直擊 | 2022-06-29 14:11

【盤房來料】港股虛火定實火 半年結後再定奪

美股隔晚表現反覆，道指早段曾升逾400點，但至中段因為世界大型企業研究會公布，美國6月消費者信心指數跌至98.7，按月跌4.5點，低於預期的100.4，創自去年2月以來最低，喺擔憂高通脹下，消費者預計今年下半年美國經濟增長將會大幅放緩。6月消費者預期指數由5月向下修訂後嘅73.7，跌至66.4，創2013年3月以來最低。消費者1年通脹預期為8%創新高，高於5月向上修訂後嘅7.5%。疲弱數據下，美股轉升為跌，道指跌491點收市；標指跟納指分別跌78點及343點，跌幅超過2%。

道指單日波幅近千點，說明美股仍處於熊市之中，不過以反彈力度計，已一次比一次弱，反映市場趁每次反彈沽貨套現，市場購買力亦逐漸消耗，熊市或已接近尾聲，但需要時間於低位整固。資金每當有好消息即借機走人，好似Nike公布一份優於預期嘅業績，一樣係高開低走，而投行股唔單止通過壓力測試，更決定加碼回購股份，但股價往往都係高開低走，資金趁好消息出貨嘅舉動相當明顯。

至於港股今早亦隨美股低開，加上港元拆息升至一個月高位，恒指低開293點，盤中跌幅曾收窄至129點，見22289半日高位，其後沽壓再現，半日最多跌430點，見21988，其後22000關失而復得。半日恒指報收22053，跌365點；國指跌181點，報7712；恒科指跌155點，又回落至5000水平之下，收4965。

藍籌股個別發展，被主要股東減持，要喺市場沽貨嘅騰訊(00700)，低開360元後見買盤趁低吸納，半日竟然倒升0.16%，報收366.4元。反而阿里(09988)、美團(03690)跟京東(09618)分別跌3.3%、2.6%及2.1%不等。汽車股見回吐，吉利汽車(00175)半日跌逾7%，成為表現最差藍籌股，比亞迪(01211)半日亦跌近4%。汽車股升咗咁多日，唞唞氣回吐都好正常。不過蔚來(09866)被沽空機構狙擊，半日插8.4%，其他中概汽車股跌幅都較大；汽車零部件股份沽壓亦較重，半日普遍跌逾半成。舜宇(02382)其實呢幾次公布嘅出貨數字都係麻麻地，但早兩日股價就無啦啦飛咗上去條100天線上面，今日回吐返6%，暫時又回落至100天線之下。

喺整個反彈浪之中，一直落後嘅內房同物管股，呢兩日總算識得郁吓追落後，今日繼續逆市造好，但有部份股份喺高位見有獲利盤沽貨，至中午升幅大大收窄，好似碧服(06098)早段曾高見38.3元，但中午升幅收窄至不足1%，收35.65元。

今日係期指結算日，今個月好友可以話大獲全勝，雖然今日指數見回吐，但似乎好友仍想保住22000水平。明日又係半年結，即使遇上長周末假期，估計個市都唔會跌得去邊。整個6月份港股氣氛改善，而成交亦略為增加，只係呢個月嘅升幅，係基金為咗粉飾櫥窗托市，定係資金再度流入，真正轉勢，暫時仍未能肯定，待下星期假期完結後，再睇睇7月開局再作定奪，反正恒指22500呢個阻力都唔細。

麥狄文
(徐狄怡‧證監會持牌人)