港股直擊 | 2022-06-28 14:35

【盤房來料】大股東反口減持 騰訊短期無運行

美股隔晚略為回吐，主要係美國10年債息重上3.2厘，不過華爾街對美股睇法較為分歧，樂觀嘅認為美股呢轉反彈可以再升多5%，但悲觀嘅認為美股至少要再跌一成，令美股近日表現較為反覆。

至於港股，喺連升三個交易日、恒指進帳1221點後，騰訊(00700)主要股東Naspers一盤冷水照頭淋，喺啲科網股升得好地地之際，表示要喺市場減持騰訊股份套現，未有提到要減幾多，只係知道目前Naspers持股量高達28%，而近日喺CCASS紀錄顯示，高盛忽然間多咗9000萬股搬咗入去，斷估呢一輪減持要沽嘅貨，可能就係呢個數目。

Naspers除咗事先張揚要喺市場減持騰訊股份之外，仲表示上周已盡沽從騰訊實物分派所得嘅京東(09618)股份，為近日炒到熱辣辣嘅重磅科網股降溫。

Naspers講到明要沽騰訊套現，睇怕騰訊一段時間只會有波幅，冇升幅，但斷估其股價又唔會有太大幅度下調，即管睇睇350元支持位頂唔頂得住，不過明知Naspers要持續沽貨，加上呢批股份流入市場後，街貨量增加，睇嚟騰訊就算唔大跌，短期內都無乜運行。

反而阿Man諗緊，阿里巴巴借住螞蟻集團重啟IPO嘅消息炒高咗唔少，其主要股東之一軟銀一向都等錢使，見Naspers沽貨套現咁過癮，未知會否有樣學樣，若然兩隻重磅股都齊齊被主要股東減持，大市想再更上一層樓亦有心無力。

恒指低開84點後，跌幅曾收窄至67點，見22162半日高位，無奈騰訊走軟，幾隻重磅科網股陪跌下，恒指半日最多跌277點，恒指半日一度低見21952點，其後22000點失而復得，重上22000水平。半日恒指跌190點，報22039；國指半日跌53點，報7763；恒科指則跌84點，報4988，5000關失守。半日成交額回落至786億元，相對噚日升市成交減少，都算係好事，反映沽壓唔算嚴重。

藍籌股又唔算太差，ATMJ各自回吐，但其他傳統藍籌個別仲有得升。騰訊半日跌4.8%，已拉低恒指85點；京東跟美團(03690)則分別跌4%及2.2%；阿里孖寶，阿里巴巴(09988)跌阿里健康(00241)則分別跌1.8%及1.7%。Naspers減持騰訊，其他手遊股亦受壓，科網股普遍跌2%以上。至於金融股略見回吐，友邦(01299)跟大笨象(00005)分別跌0.4%及0.7%。市場擔心供應緊張，油價回升，中海油(00883)半日升3.2%，燃氣股藍籌新奧(02688)升3%，萬洲(00288)亦升3.3%，係三隻表現最好藍籌股之首。

發改委稱完善煤炭市場價格形成機制，引導煤炭價格在合理區間運行，同時加快沙漠等重點地區大型風電光伏建設，電力股今日有追捧。而阿Man愛股之一嘅龍源電力(00916)今日除淨後，股東成功搶息，股價半日再升3.1%。睇返龍源電力早已被唔少大行列入今年下半年首選港股名單，偏偏喺今輪反彈浪之中表現落後，今日借消息炒上，希望升勢可以撐多幾日，股價睇下可唔可以升穿20及50天線交匯區後，重上16元水平。

麥狄文
(徐狄怡‧證監會持牌人)