港股直擊 | 2022-06-21 14:39

【盤房來料】港股市底改善 惟成交未配合升勢

美股隔晚假期休市，歐央行表明將加息抗高通脹，但喺憂慮經濟衰退下，決定嘗試一邊加息，一邊QE，歐洲股市造好。道指期貨造好，加上虛擬貨幣反彈，市場風險胃納改善，港股噚日升完，今日再升，並成功收復10天線(21368)。

恒指高開101點，報21264，升幅一度收窄至12點，低見21175，不過道指期貨喺亞洲時段表現唔錯，港股升幅擴大，半日最多升340點，見21504半日高位後回順。半日恒指升302點，報21466；國指升112點，報7512；恒科指升69點，收4726。不過半日成交額只有619.42億元，又係乾炒牛河，成交唔多配合升幅。

藍籌股普遍做好，除咗中電(00002)發盈警，喺澳洲炒燶電，中期將錄得虧損，股價半日跌5.8%，藍籌之中跑第尾。大笨象(00005)表現突出，半日升3.2%，股價重上50元企穩。友邦(01299)半日亦升3.2%。噚日受澳門疫情升溫影響嘅金沙中國(01928)，半日反彈2.7%，市場估計澳門疫情可控，濠賭股呢一轉唔會捱好耐。除咗大笨象同友邦，今日內地金融股亦見資金追捧，其中平保(02318)半日升2.6%。

科網股今日輪到二線科網股發力，最重磅嗰幾隻龍頭反而要唞唞氣，美團(03690)有主要股東減持，雖然數量唔算多，早段股價曾落過195元水平，半日跌幅收窄至0.1%，維持強勢。京東(09618)喺今次嘅618購物節，雖然平台銷售量增長放緩，但大行對今次618購物節嘅成績都肯收貨，股價半日僅回吐0.4%。至於騰訊(00700)，今日追落後，半日升逾2%；阿里(09988)半日則升0.5%。二線科網股發力，阿里健康(00241)半日升逾一成，成為表現最好藍籌股；京東健康(06618)半日升3.8%。除咗二線科網股造好，今日生科股亦跑贏，板塊內股份閒閒地升4%以上，個別次一線嘅生科股，升幅更超過一成。

內房股跟物管股續彈，仍維持升勢，噚日急升一成嘅碧服(06098)半日再升近半成，表現突出，其他物管股普遍升3%以上。內房股喺過去一星期，售樓成績報捷，內房股今日再升，其實相對其他板塊，內房股可以話大落後，雖然仍有個別房企仍受債務問題困擾，但大部份房企嘅債務問題已陸續解決，加上阿爺建議內銀加大貸款額度，內房最壞時間已過，經過一段時間行業整合，龍頭內房股更顯投資價值。

港股市底暫時偏強，阿爺不斷推新政策維穩，只可惜外圍走勢較反覆，限制咗港股升幅，暫時恒指喺20800至21800點之間上落，但要重上22000點水平企穩，似乎喺成交上未能配合，除非再有大量資金流入，否則22000水平難見突破。

麥狄文
(徐狄怡‧證監會持牌人)