港股直擊 | 2022-06-20 14:23

【盤房來料】美股假期港股暫無方向

美股上周五雖然喘定，標指跟納指更見反彈，不過標指下周跌幅達5.8%，係自2020年以嚟表現最差嘅一周。除咗美股表現不濟之外，虛擬貨幣市場於周末期間再見有個別虛幣爆煲現擠提，比特幣跟以太幣更分別跌穿20000及1000重要心理關口。雖然低位有反彈，但虛幣市場整體市值已跌穿1萬億美元，即使相對美國整體21萬億美元嘅經濟總值，或價值43萬億美元嘅樓市相比，係蚊脾同牛脾，甚至比唔上蘋果公司市值嘅一半，但有調查顯示，喺全球加密貨幣市場之中，美國投資者佔咗三分一，以其中有16%美國成年人曾投資、交易或使用過加密貨幣。加陣虛幣市場插水，意味住會影響美國消費意欲，而消費為美國經濟提供七成貢獻。美股受經濟衰退影響，近日走勢危危乎，令到受阿爺出盡辦法支持嘅港股，升勢亦受阻。不過始終有內地股市頂住，港股低開後，21000點失而復得，半日倒升收市。

恒指低開126點，半日最多跌235點，見20839半日低位，其後喺A股帶動下，恒指扭轉跌勢，最多升100點，見21175半日高位，最多升100點，重返50日線(20870)之上。恒指中午報收21109，升34點；國指升5點，報7373；恒科指半日跌幅收窄至22點，收4631。雖然上證指數半日升不足1點，但深圳創業板指數急升2.4%。

過半數藍籌股上升，友邦(01299)半日升1.5%；港交所(00388)半日升1.3%；平保(02318)半日升0.9%；但大笨象(00005)半日跌0.8%。內需股升幅較為顯著，華潤啤酒(00291)跟李寧(02331)半日分別升4.7%及3.2%。重磅科技股普遍腳軟，618購物節銷售增長放緩，京東(09618)半日跌近3%，阿里(09988)半日亦跌逾1%；騰訊(00700)跟美團(03690)半日跌不足1%。網易(09999) 旗下手遊「暗黑破壞神：不朽」上線計劃推遲，股價半日跌7.7%，藍籌股之中跑第尾。

上周內房售樓數字首幾靚仔，內房跟物管股半日表現突出，碧服(06098)半日升12.3%，成為表現最好藍籌股，同系碧桂園(02007)亦升逾7%。其他內房股跟物管股普遍做好，升幅閒閒地超過半成。

澳門疫情升溫，更於噚日開始進行為期三日全民核酸檢測，濠賭股受壓，當中有大行指金沙中國(01928)面對較大資金壓力，股價一度跌逾8%，半日跌幅收窄至3.1%。其他濠賭月股亦受壓，普遍跌逾2%。

憂慮全球經濟陷入衰退下，油價上周五急挫，資源價格亦走弱，資源股今日受壓，中海油(00883)半日跌近半成，其A股半日更跌近一成。其他資源股走軟，跌2.3%至超過7%不等。汽車股維持強勢，尤其新能源汽車股表現突出，當中幾隻中概汽車股，半日跑贏大市。

今晚美股休市，暫時港股無乜方向，雖然阿爺多番推政策維穩，但美股搖搖欲墜，限制咗港股嘅反彈力度，恒指喺21000附近上落，值博率甚低，既然未係時候出手，倒不如靜觀其變，一動不如一靜。

麥狄文
(徐狄怡‧證監會持牌人)