港股直擊 | 2022-06-16 14:17

【盤房來料】勁殘教育股喪炒要加倍小心

隔晚聯儲局議息，終如市場最新預期的加0.75厘，不過鮑爺一句加息0.75厘唔會成常態，市場就解讀為聯儲局取態唔會更加鷹，美股倒升收市，道指升303點，標指升54點；納指更升逾2%，升270點。其實聯儲局講到明，堅決承諾將通脹率恢復到2%目標，咁如果要達標，又何止加0.75厘息，阿Man就唔多明，美股嘅投資者，點可以咁樂觀。聯儲局要通脹回落至2%，除咗大幅加息，另一個有機會發生嘅就係經濟衰退，需求回落，自然通脹回落，咁即係唔加息就用經濟衰退嚟交換，其實呢兩個情況，對股市都係利淡，美股隔晚倒升，真係有啲耐人尋味。

唔知係咪港股呢邊啲投資者心水清少少，恒指早段高開207點，見一見21545點半日高位後就掉頭回落，可能就係諗到加息0.75厘唔係常態呢句說話，唔係一定加少啲息，而係聯儲局有可能陷入兩難局面，所以高開低走，中午已倒跌，半日見過21156低位。半日恒指收報21156點，跌85點，10天線始終未能收復，下半場再受壓亦唔出奇，好友要力守條20天線(21035)及50天線(20910)。國指半日跌38點，收7414；恒科指半日報4677點，跌26點。

藍籌股只有三分一股份上升，ATMJ全部高開低走，騰訊(00700)半日跌2%；阿里(09988)跟京東(09618)仲係食住618購物節條水，半日保持升幅，但升幅分別收窄至0.1%及2%；美團(03690)半日亦倒跌。舜宇(02382)半日彈3.2%，係表現最好藍籌股，呢鋪佢升最多，都算爆冷。至於表現最差藍籌係東方海外(00316)，半日跌6%，過去一年嘅染藍股，成為新貴後都跌到一仆一碌，唔知東方海外能否打破宿命。而噚日急升嘅平保(02318)今日已唔多夠力，半日升幅收窄至0.2%，隨時今日倒跌散場。

美國繼續加息，雖然港銀呢邊按兵不動，但拆息其實已緩緩向上，隨住息差擴闊，本地銀行股亦造好，不過一旦經濟未能復甦甚至惡化，對銀行呢個百業之母嚟講並非好事，阿Man唔主張為咗收息去買銀行股，隨時收息輸價。

教育股炒到出煙，新東方在線(01797)升到唔識停，半日再升近六成，再創52周新高。至於其他教育股，全部入晒升幅榜，至少都升18%，其他升逾五成嘅教育股比比皆是。阿Man自問無膽炒呢啲急升股，今日可以急升成咁，只要炒作熱錢一流走，單日跌返兩三成係等閒事。尤其係炒到啲咁殘嘅板塊，可見市場上嘅資金已無出路，整體市況有幾好，連殭屍股都落鑊，真係要加倍小心。

 

麥狄文
(徐狄怡‧證監會持牌人)