即巿股評 | 2022-05-30 13:46

【盤房來料】大市反彈阻力21200-21500

美國上周公布嘅經濟數據，反映通脹有機會見頂，美股顯著回升，納指升勢更強，周五急升逾3%。內地疫情見緩和，為了刺激經濟，上海昨日公布《上海市加快經濟恢復和重振行動方案》。港股上周五急升581點後，今早乘外圍做好，恒指更上一層樓，重上21000大關，並成功收復50日線(20884點)。

恒指高開236點，收復50日線，雖然曾回落至20885半日低位，但50日線守住，升幅再度擴大至469點，見21167半日高位。半日恒指報收21084，升387點；國指升157點，報收7239；恒科指則升130點，報收4317。半日成交略為回升至734.61億元，暫時未見資金太積極入場。

藍籌股大部份隨大市上升，大笨象(00005)加碼回購，股價升至超過一個月高位，半日升1.3%；友邦(01299)重上80元水平，半日升1.2%，其他金融股普遍上升。比亞迪(01211)維持強勢，更升至5個月高位，半日升1%，不過280元有一定阻力，有貨喺手睇住食糊套利。俄羅斯一直以燃氣供應威脅歐洲各國，令油價高居不下，中海油(00883)升至52周高位，半日升2.8%。相反內房股雖已陸續有政策扶持，可惜債務問題唔易解決，加上銷售狀況未有耐回復，內房股偏軟，龍湖(00960)半日跌1%，成為表現最差藍籌股。

科技股普遍做好，美團(03690)將於本周四派季度業績，半日股價升7.3%，冠絕ATMXJ，成交額更居位榜守。京東(09618)緊接其後，半日升4.7%，不過220元阻力唔細，未知能夠成功突破。阿里巴巴(09988)半日升2.1%，唔少人等緊阿里呢轉有冇機會重返紅底股，阿Man就唔係太樂觀，始終電商股市場似乎更偏愛京東。

上海昨日公布《上海市加快經濟恢復和重振行動方案》，當中提到刺激內需為重中之重，內需消費股半日做好，升幅閒閒地超過半成。李寧(02331)半日升近一成，係表現最好藍籌股。上海解禁，北京亦未見進一步封城，餐飲股做好，海底撈(06862)跟九毛九(09922)半日分別升7.9%及9.3%。啤酒股亦有資金追捧，潤啤(00291)跟青島啤(00168)半日分別升7.3%及5.5%。

港股能否持續反彈，當然要睇外圍走勢如何，不過講到底要保持反彈之勢，甚至扭轉上落市格局，步入另一個升浪，最終都要靠成交配合，暫時仍未見有新資金大量流入，阿Man都只係視今次為反彈浪。恒指重上21000水平，但仍要企穩兩三個交易日，方能確定轉勢，更何況21200-21500阻力唔細，若然恒指再度重返20800水平之下，恐怕上落市格局仍要持續。

麥狄文
(徐狄怡‧證監會持牌人)