港股直擊 | 2022-05-20 15:37

【環宇搜股】現金為王少徬徨

自2月起筆者在多個地盤(美股歷奇、環宇搜股及EJ Market)睇淡美股，近日更被網友起咗個「朵」叫大熊，首先多謝各位捧場，本人絶非一隻單邊睇淡嘅「大灰熊」，例如2020年3月股市急墜之時，筆者喺首批Call「Strong Buy」的財演。

港股近期比美股好，尤其近兩個星期，市場普遍認為政策出台為中港股市打氣，筆者傾向因為本周美滙轉弱，其他外幣反彈，當中包括人民幣，以離岸價計，人民幣上周一度貶至6.8375兌一美元，目前已回升至6.6943，即回升1432點子。

人民幣回升是利好中港股市，尤其對比美股，港股已率先下跌，但始終美股目前危危乎，最終依然會拖埋中港股市落水，只喺跌嘅幅度會比美股細。

目前全球最大危機依然喺美國，因為聯儲局要壓通脹，繼續唔手軟加息，自自然然地高風險資產全線倒下，包括虛擬貨幣、股市以及垃圾債或公司債。

小心美高收益債出事

筆者5月3日在《信報》另一地盤「美股歷奇」中已透露，高收益公司債券ETF(HYG)值似直線急墜，對股市絶對不利，原因是HYG與標指及納指過去15年Correlation高達0.73及0.7，目前HYG正向水底出發(圖一)，標指與納指勢無運行。

別忘記固定資產市場遠比股市大，單是截至去年底止，全球債市規模為123.5萬億美元，股市只得66.4萬億美元，即是股市只喺債市規模的53.7%，一旦高息債出事將會燒著其他資產，也會引致推高美元質低美國長債債息，從而影響股市。

現開淡倉易被挾

美股標指短期不排除會反彈，但廿天線(現處4102)依然阻力重重，一旦質穿上周四低位3858點，便會進一步下滑，目標依然是15.5倍預期標指市盈率水平，即3528點。

本欄模擬倉其實一早已在標指4550點附近建立淡倉，當中包括三倍槓桿反向納指及標指ETF，截至昨日今年共升20.8%(圖二)，對比標指同期下滑18.2%，由創立(2019年7月1日建創)則升81.1%，也比同期標指共升32.6%高(圖三)。

目前主要持倉93%是槓桿3倍反向ETF產品，主要原因是仍睇淡美股後市(以標指升穿廿天線止蝕)，好倉則主要是金礦、化肥及農業股。值得留意是現時未必再值得建立淡倉，因好易被挾，但買市升又好易中伏，唔夠貼市嘅朋友，目前最好就喺「企定定喺度，揸Cash有著數」，等美股回落至3500點樓下，才慢慢執平貨。

編按:作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周三、五在「信報網站」及「港股360」撰文。