港股直擊 | 2022-05-13 14:18

【盤房來料】港股漸見支持可惜成交未能配合難大升

隔晚美股表現反覆，美國公布4月PPI升至11%，加上虛幣市場因為stable coin急瀉，令美股三大主要指數一度全線向下，不過其後鮑爺重申6月及7月時加息0.5厘係恰當做法，即係進一步確立5月份議息時所講嘅排除未來每次加息0.75厘嘅可能性，算係減低咗市場恐慌嘅程度，美股亦自低位反彈，納指更倒升收市。納指隔晚率先轉跌為升，今晚能否進一步攀升至11500點，係美股能否喘定並展開反彈浪嘅關鍵，若然納指呢個前支持位，確定成為阻力位，咁美股即使能喘穩，都好難出現一波較大而急嘅反彈。

至於港股隔晚夜期時段跟進美股向下，但至今早道指期貨反彈，港股反而高開，納指轉跌為升更造就恒科指重上4000大關。雖然港元跌至弱方兌換保證，令金管局再度出手買入28.47億港元，兩日加埋一共接貨69.47億港元，以捍衛聯繫滙率，但港股反而今日高開高走，完全漠視港元疲弱，以及人民幣再創新低嘅利淡因素。除咗因為美股隔晚急跌後喘定之外，內地股市亦做好，恒指半日曾高見19825，升444點。中午恒指報收19767，升387點；國指升153點，報6748；恒科指更升近4%，報收4015，升150點。半日成交額628.48億元，以周末前夕嚟講，咁嘅成交都算係咁。

藍籌股普遍向上，大笨象(00005)咗幾日，落到條250日線(46.32)附近見支持，半日彈近2%，其他金融股亦做好，友邦(01299)半日升0.2%；內銀跟內險股亦見反彈，當中以工行(01398)半日升2%表現較佳。科網股表現較突出，多得隔晚納指拗腰倒升，ATMXJ之中，近排一直較弱嘅小米(01810)，半日竟然反彈半成，算係畀咗一眾米粉絕望中嘅一點點希望，不過股價落到嚟10元水平先識彈，上面個個位都係蟹貨，高位仲有貨喺手都咪話唔頭痕。美團(03690)呢排喺北水積極掃貨下，特別強勢，半日升4.4%，跑贏阿里(09988)跟騰訊(00700)，兩股半日分別升3.1%及2.8%。其他重磅科網股，半日普遍錄得3%以上升幅。

雖然人民幣仍然向下，但內房股跟物管股今日叫有得下，中海外(00688)跟碧桂園(02007)呢兩隻成份股，半日彈返4%。汽車股表現突出，除咗龍頭比亞迪(01211)升4.4%之外，其他汽車股普遍都錄得3%以上升幅。

話咁快又嚟到星期五，港股周初見過低位19200水平後，港股理應有一波反彈，可惜成交一直唔配合，港股要反彈亦只能寸進，再加上人民幣跟港元疲弱，即使周二低位有撈貨博反彈，亦只能步步為營。

麥狄文
(徐狄怡‧證監會持牌人)