即巿股評 | 2022-05-12 14:22
隔晚美股反覆向下,美國4月CPI反映通脹仍然高企,聯儲局嘅貨幣緊縮政策料持續,高估值股份遭血洗,即使有盈利嘅大型科技股亦要陪跌。與此同時,虛擬貨幣市場暴跌,主要係跟美元掛鈎嘅stable coin爆煲,凡此種種都反映市場資金正逃離高風險資產,唔願意冒險。美元持續強勢,令人民幣進一步走弱,港元觸及弱方兌換保證,金管局要入場維持秩序,對上一次金管局出手托價已經係2019年5月嘅事。喺人民幣跟港元弱勢下,港股今早低開,不過內地股市算企得穩,上證指數死守3000點之上,令港股跌幅一度收窄。
恒指低開267點,其後A股轉跌為升,港股跌幅亦收窄至93點,恒指盤中曾見19731半日高位。可惜人民幣跌至19個月低位,拖累港股一度跌309點,見19515半日低位,至中午收市前跌幅略為收窄。半日恒指收報19615,跌208點;國指跌85點,收6684;恒生科指半日跌59點,4000大關得而復失,中午收3959。半日成交額577.36億元,暫時沽壓未算嚴重,同時亦係買賣兩閒,始終未見資金肯入場。
藍籌股普遍下跌,但友邦(01299)卻逆市反彈1.5%,成為表現最好藍籌股。大笨象(00005)半日跌1.8%,其他內銀股跟內險股普遍下跌,只有中國人壽(02628)半日逆市靠穩,微升0.35%。美股科網股跌到一仆一碌,香港呢邊嘅科網股跌勢相對溫和,美團(03690)跟騰訊(00700)早段更曾逆市上升,中午則分別跌0.1%及0.4%。不過電商股阿里(09988)跟京東(09618)表現則較疲弱,前者跌4.3%,後者跌5.3%。
人民幣疲弱,內房股跟物管股沽壓沉重,碧桂園(02007)半日跌5.8%,成為表現最差藍籌股;華潤置地(01109)半日跌少於1%,已經算本事,同樣有個央企光環嘅中國海外(00688),半日跌逾3%。國企央企內房股都尚且要跌,更何況其他民企內房,整個板塊均見受壓,半日跌幅閒閒地超過3%。物管股同樣無運行,母企銷售數字預咗唔會好得去邊,物管股自然無得發,物管股半日跌幅由超過2%,至到最多跌兩成。
寶龍商業(09909)向控股股東買入上海辦公大樓,股價半日跌兩成,似乎市場唔多滿意公司喺呢個時間向控股股東買入旗下物業,有向其揼水之嫌。尤其內房跟物管股喺呢段時間,除非有好筍價嘅收購機會,否則亂咁掃貨都唔係好事,更何況同控股股東買貨。總理李克強昨日主持召開國務院常務會議,計劃向中央發電企業撥付500億元人民幣再生能源補貼,綠能股逆市上升,不過由於市況問題,唔少高開之後,升幅都縮晒水。
雖然美股走勢比較差,而人民幣跟港元走勢亦疲弱,但中港兩地股市,似乎喺現水平有一定支持,可能同阿爺已多次出口術或出招,刻意穩住股市有關。只係港股由21200回調至19200水平見初步支持都好,但喺缺水情況下,無資金流入,欠缺動力,暫時亦只能於20000水平之下整固,反覆上落。
麥狄文
(徐狄怡‧證監會持牌人)