即巿股評 | 2022-05-10 14:12
雖然鮑爺喺議息會議已表示排除未來加息0.75厘嘅可能,但隔晚美國10年債息攀升至3.2厘,美股嘅科技股領跌,三大指數跌幅顯著,更跌至今年低位。幸而A股低開高走,上證指數半場已倒升,令港股今朝低開,跌逾800點創逾兩個月低位後,跌幅收窄。
恒指裂口低開701點,跌幅一度擴大至823點,見19178點半日低位,亦跌至兩個月低位,其後內地股市倒升,港股跌幅亦收穿至345點,見19656半日高位。不過市場氣氛疲弱,半日恒指仍要跌逾500點收市,報19436,跌565點;國指中午收6585,跌224點;恒科指半日跌189點,報3846。
藍籌股普遍下跌,雖然美息上升,港息亦跟隨,但金融類股份仍要下跌,友邦(01299)半日跌1.6%、大笨象(00005)跌幅更達2.4%;平保(02318)半日跌2.6%。有傳聞指碧桂園(02007)位於成都、福建等多地監管賬戶被凍結,但該公司已解釋於福建參股項目發生「客訴」,涉及事宜已解決,不過市場仍半信半疑,碧桂園半日跌逾12%,連帶旗下碧服(06098)亦跌12%,兩股成為表現最差成份股。不過阿Man卻認為,碧桂園喺過去一年,內房股爆雷之際,從未見有任何債務遺約,更曾多次以超值價格收購同業,其財務實力可見一班,反而今日股價跌逾一成,係趁低吸納嘅好機會。
美國嘅科技股跌到一仆一碌,港股呢邊嘅科技股陪跌亦好正常,騰訊(00700)、美團(03690)半日分別跌3.7%及5.4%,不過今早低位,正好係阿Man捕住要撈貨嘅水平,145樓下嘅美團跟335樓下嘅騰訊,又可以上一上車。至於京東(09618)半日跌近一成,200元邊又提供一個短炒上車機會。其他科網股半日跌半成閒閒地,不過博個市短期跌夠要反彈,都係揀返騰訊、美團同京東呢三寶。
國際油價急挫6%,石油股回軟,三桶油嘅中石油(00857)跟中海油(00883)半日跌逾半成,中石化(00386)亦跌2.8%,其他石油相關股份,普跌2%或以上。除咗石油股受壓外,資源股亦見沽壓,金價雖然未見大幅回落,但紫金(02899)半日跌近一成,其他資源股閒閒地跌半成或以上。
大市早段跌逾800點後反彈,而牛證重貨區已屠宰得七七八八,暫時19000至19200可能係短線支持位,而今早阿Man喺低位亦撈咗些少指數重磅股博反彈,短線反彈阻力為19800至20000,暫時都只能多做短線操作,尤其係美股形勢惡劣,一旦美股再有乜嘢冬瓜豆腐,港股難免受拖累,幸而係港股之前已自殘,跌先一步,唔少高估值嘅科網股,已調整咗一段時間,股價亦已回落至較合理水平,喺19500樓下分段買貨,已有一定值博率。
麥狄文
(徐狄怡‧證監會持牌人)