即巿股評 | 2022-05-06 14:22

【盤房來料】人民幣走弱港股假前捱沽

隔晚美股大跌，道指更跌逾千點，雖然鮑爺喺議息會議已派咗糖，指目前唔會加息0.75厘，本來市場認為收水步伐唔激進，前晚一度刺激美股急彈，但當市場再冷靜落嚟分析，收水步代勒住勒住，正正係擔心經濟或有機會陷衰，但物價高企下，陷入滯脹，其實唔係乜嘢好事。一刻興奮過後，10年債息又再上返3厘以上，美股隔晚回復跌勢。美息再上，令人民幣繼續走弱，更一度穿6.7元，加上港元亦接近弱方兌換保證，港股難逃一跌，上半場一度跌逾800點，目前險守20000大關，雖然此關失而復得，但唔排除好快得而復失。

恒指低開506點，一開市已跌穿10日線(20463)，人民幣疲弱下，港股跌勢加劇，恒指一度失守20000大關，見19976半日低位，跌816點。半日恒指報收20051，跌741點；國指報6827，跌289點；恒科技半日更跌逾半成，中午報收4044，跌214點。半日成交額634.2億元，以假期前夕嚟講，都唔算少，而市場超過八成股份下跌，今日跌勢都幾全面。

藍籌股大部份走軟，只有聯想(00992)逆市升1.7%，成為表現最好藍籌股，主要係有傳聞指中國政府機構需要更換本國產品。大笨象(00005)半日跌2.7%，早兩日阿Man都話大笨象50水平能否企穩成疑，結果今日又打回原形，重返50之下。港交所(00388)半日亦跌3.7%，之前係威係勢彈到340上面，但睇返整體大市成交仍然落弱，而本身港交所估值又唔算平，要扭轉弱勢談何容易，暫時都係最多炒上落，上落區間咪320至340左右。中信行(00998)供股，引發內銀股集資潮疑慮，內銀股普遍跌1%以上。友邦(01299)半日跌3%，始終內地一日未能完全解封，友邦係內地業務寸步難行，股價亦只能上上落落，80阻力難過，未知何時能收復失地。

美股嗰邊嘅科技股跌到一仆一碌，大大小小嘅科企插到走晒樣，港股呢邊嘅科網股又豈能獨善其身，即使阿爺之前已出晒口術，令市場憧憬內地對相關企業監管完結，甚至有扶助其發展嘅舉措。可惜只係打嘴炮，而未見住何實際措施推出，急升過後隨大市回落市正常。騰訊(00700)半日跌4.5%，美團(03690)跟京東(09618)半日分別跌5.2%跟6.7%，其他科網股閒閒地跌半成或以上。

債息高企令未有盈利估值較高嘅生科股捱沽，信達(01801)終止與Coherus合作協議，半日插6.9%；龍頭藥明生物(02269)半日跌近6%，板塊內其他股份跌半成甚至一成比比皆是，阿Man都講咗暫時呢個板塊未宜撈底，因為低處未算低。

麥狄文
(徐狄怡‧證監會持牌人)