即巿股評 | 2022-04-27 10:50

【輪證贏家】納指Put兩日平均賺幅有一成

其實如果係做即日策略的話，正如噚晚喺電台所講，唔需要複雜，先好後淡就已經可以，同時噚日個市以五分鐘圖計，技術走勢都比較容易睇得到，先係朝早指數喺五分鐘圖上守穩保歷加通道中軸後呈上，繼而中午前至下午開市初段受制於750分鐘線(五分鐘圖150線)再落，落到接近完場前指數都始見有少少喘定，呢時間基本上咩位都可以收工。

今朝起身開電視睇新聞，見到直簽出咗隔晚道指跌逾800點，兩日前嘅納指Put(10387)，雖然只係paper trade，不過都有種莫名奇妙嘅興奮，依家9點16分，恒指仲做緊U盤，到開市之後睇下隻(10387)輪價開幾多先。

美股大瀉，港股當然唔好受，完U後恒指開市報19723點，跌211點，坦白講比我想像中低開幅度少咗，而以呢口價計，牛證第一層19800至19899點嘅街貨已全數被收回，呢度得相當於4張期指咁大把，至於19700至19799點呢庋就有400幾張期指街貨，以開市價計其實爭23點就可以全數收回。

依家9點47分，恒指正式開市後指數已快速向下殺晒19700至19799點呢層，之後指數都見低開高走，老實講今朝雖然覺得隔晚美股跌逾800點，但今朝恒指開跌211點係比較少，不過見市場解讀美股急瀉嘅原因，其實同之前講開嘅都係差唔多，唔係話怕加息步伐加息會經濟，有衰退可能，就係話烏俄戰爭尚未停火，唔知邊個吹到話有可能觸發第三次世界大戰，新少少嘅有美股大型企業進入業績期，擔心業績樣衰會拖低指數云云。

至於隻(10387)，今早開市輪價報0.25元，對比起兩日前嘅平均買入價0.226元有10.62%賺幅，明白到納指輪呢啲可能對於投資者嚟講係一種「想像上」比較難處理嘅產品，買美股已經隔重山，仲要涉及到有槓桿成份嘅產品，所以基本上美指輪喺港股交易時段真係唔多活躍，唔似得可以用恒指嚟捕捉即市嘅Swing Trade位，美指輪可能要用到小時圖至日線圖去捉以「日」嚟做單位嘅策略買賣，咁反而適合一啲唔可能成日都對住個市(依家大家應該都返番工，無得WFH啦)，而又對美股嘅興趣大於港股嘅朋友。

的確，所用嘅技術分析同睇港股嘅真係一模一樣，都係嗰啲指術指標，都係同一個方法畫嗰啲線，以目前計納指日線圖上保歷加通道口仍然拓闊中，Slow STC(14,3)隨時會繼續被迫行超賣再超賣，只不過嚟到呢個moment要留意，隔晚美股大瀉，理論上引伸波幅會再被抽高，倘若今晚美股再跌，但係點數上/幅度上都唔及噚晚咁顛嘅時候，小心引伸波幅會收窄，出現縮Vol嘅情況呀。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。