即巿股評 | 2022-04-22 11:01

【輪證贏家】DSE 加油！裂口底 加油！

疫情下嘅DSE終於都開考，阿姨我係會考年代嘅產品，雖然唔太清楚一試定生死嗰種感覺，但阿姨我當年考完個會考都怕咗個公開試，只係讀多一年中六，自製三三四，無考AL直入大學(那年台灣大學收生要求只要夠18歲同會考合格就OK，不過就要讀四年)，咁計落我都算係憑住當年會考同自己「一試定死生」。我當年都唔係考得好，一睇就知我根本唔係讀書材料，但事實係呢個世界的確有好多好多出路，總係你意想不到，呢一個只係一個過程嚟架咋，到你出嚟社會，唔會有人想知你DSE考幾多分，只係要你喺職場有求生能力就得。

學生比心機應付考試，咁啱作戰室都有一位教師今日開始忙著DSE嘅工作，而大家都一齊揸住隻淡倉幾日，老師你都要努力做好監考工作呀！我哋會幫你睇住架啦。

揸咗幾日嘅恒指Put(27294)，今日怕且都可以隨時收割，事關今朝恒指開市報20261點，又嚟裂口低開420點，而以今朝開市價計，同目標3月18日嘅大型裂口嘅裂底部20120點，只係爭141點。同一時間，恒指向下跌400幾點開市，都將牛證首兩層街貨全數收回，呢兩層當中包括咗過千張期指街貨嘅重貨區，所以今朝一完U，指數就殺咗相當於1965張期指嘅牛證街貨。

到正式開市之後，指數咁大個裂口向下挫落去，低開高走都好合理；不過，以恒指現價計，指數都係仍然靠近下方牛證街貨層，而又真係同個裂口底部咁鬼近，好啦，(27294)目標見裂口底，堅定不移，除非小時圖上破咗10小時線啦。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。