即巿股評 | 2022-04-13 11:36

【輪證贏家】恒指熊等STC出Swing Trade

噚日揀咗隻全場最高槓桿嘅恒指熊(68768)出嚟，喺下晝大約1點25分至1點30分，見到恒指五分鐘圖上Slow STC(14,3)兩線重上嚴重超買水平，同步見指數喺五分鐘圖出現「平頂」，並於750分鐘線(五分鐘圖150線)前止步，呢個時侯出隻(68768)，平均買入價為0.066元，set定以小時圖企穩10小時線(小時圖10線)以上止蝕。

好境當然就不常架啦，指數同Slow STC(14,3)上到當時偏高位置之後，期後喺五分鐘圖上稍回，本以為呢趟可以做到Swing Trade，誰不知指數喺2點打後再嚟多浸升勢，以2點後小時圖10小時線(小時圖10線)見21244點計，喺2點25分左右已經上破咗，(68768)要即時逃難，以2點25分on top加15分鐘作為走難時間，期內(687368)高低位做過0.066元/0.046元，平均走佬價為0.056元，即平均輸10格或17.86%。本來上個星期都追得返月初嘅損失有凸，依家又要比返晒佢。

嬲就嬲在之後指數走貨喺噚日高位，其後指數跌到收市咁滯，喺U盤抽返高少少；今日指數完U後再跌126點，激氣，喺作戰室識得搵隻Put嚟做中線，但往往有啲位就係手痕，今個月過咗一半左右，有種感覺係「呢度賺嚟嗰度蝕」。

可能個天都知我條氣有啲唔順，到正式開市之後，恒指即以低開高走格局運行，可惜上同落嘅力度都未見，隨時連個市都唔係好知佢自己想去邊咁。

睇返個日線圖，見指數今日仍然都低於 20天線以下位置，而保歷加通道則見到通道口嚴重收窄，而指數目前同底線嘅距離爭500幾點，隨時一個失心瘋好似星期一(4月11日)咁跌600幾700點，真係咁就到步。

依家9點49分，指數仍然都係喺跌百鬆啲點數度運行，五分鐘圖暫見指數受制於250分鐘線(五分鐘圖50線)，頭頂仲有條50分鐘線(五分鐘圖10線)向下落去擋指數去路咁款，恒指熊(69805)，收回價21685點，同現價有逾400點差距，市場上最高槓桿，有約31.7倍，隨五分鐘圖嘅保歷加通道都開始收窄，指數已經出現觸底走勢，Slow STC(14,3)都見由低位上返去超買水平，不過又怕到時保歷加通道口拓闊返嘅話，咁指數乘機再上，就睇睇Slow STC(14,3)上到超買時再比多少少時間 ，確認到指數同Slow STC(14,3)都高位回落嘅話，咁先至出隻(69805)啦。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。